༄༅། །མི་འགྱུར་དཔལ་གྱི་སྒྲོན་མའི་རྣམ་རོལ་རྗེ་བཙུན་མ་མུ་མེད་ཡེ་ཤེས་མཚོ་མོའི་རྣམ་ཐར་དད་པའི་ཤིང་རྟ་ཞེས་བྱ་བ།
ཨོྃ་སྭ་སྟི།
མདོ་སྔགས་ཆོས་ཚུལ་སྨྲ་ལ་འཇི༵གས་མེ༵ད་ང༵ག་གི་དབ༵ང་།།
ཕུ༵ན་ཚོ༵གས་བྱེ་བའི་འབྱུ༵ང་གན༵ས་བློ་གྲོས་མཚུ༵ངས་པ་མེ༵ད།།
ཐུབ་བསྟན་གསལ་བྱེད་རྒྱལ་བས་ཡོངས་བསྔགས་ཆོས་ཀྱི་རྗེ།།
རྫོགས་པའི་སངས་རྒྱས་དྲིན་ཆེན་བླ་མ་རྒྱལ་གྱུར་ཅིག།
ཆོས་དབྱིངས་མུ༵་མཐའ་མེ༵ད་པའི་མཁའ་ཀློང་ཆེར།།
རང་སྣང་ཡེ༵་ཤེ༵ས་ལོངས་སྐུའི་ཉི་གཞོན་མཛེས།།
གང་འདུལ་ངོ་མཚར་མཛད་པ་རྒྱ་མཚོ༵་སྐྱོང་།།
སྐུ་གསུམ་བླ་མ་ཌཱཀྐིའི་གཙོ་མོ༵་རྒྱལ།།
མགོན་དེའི་མཛད་པ་ཡོན་ཏན་རྒྱ་མཚོའི་གཏེར།།
བགྲང་ཡས་བདེ་གཤེགས་རྣམས་ཀྱིས་བརྗོད་དཀའ་ན།།
བྱིས་པའི་བློ་ཡིས་དཔོག་པར་ནུས་མིན་ཡང་།།
རང་བློ་དད་པའི་རྟེན་དུ་མདོ་ཙམ་སྤྲོ།།
དེ་ལ་འདིར་བདག་ཅག་རྣམས་ཀྱི་སྐྱབས་མགོན་བླ་མ་དམ་པ་སྐུ་གསུམ་ཌཱཀྐིའི་སྤྱི་དཔལ་རིགས་བརྒྱའི་ཁྱབ་བདག་མུ་མེད་ཡེ་ཤེས་མཚོ་མོ་ཞེས་སྙན་གྲགས་ཀྱི་བ་དན་སྲིད་པའི་རྩེ་མོར་སྒྲེང་བ་གང་གི་རྣམ་པར་ཐར་པ་རྒྱ་མཚོ་ལྟ་བུ་ལས་འདིར་ཆུའི་ཟེགས་མ་ཙམ་གླེང་བ་ལ་གཉིས་ཏེ། སྐུ་སྐྱེ་སྔ་མའི་མཛད་རྣམ་མདོ་ཙམ་སྨྲོས་པ་དང་། སྐྱེ་བ་འདིའི་མཛད་རྣམ་ཅུང་ཟད་སྤྲོས་ཏེ་བཤད་པའོ། །
དང་པོ་ནི། རང་གཏེར་ཤ་འུག་གཏེར་བྱོན་གབ་རྒྱའི་ལུང་བྱང་དུམ་བུ་མཐའ་མ་ལས།
ཁྱད་པར་བདེ་གཤེགས་ཀུན་འདུས་མན་ངག་འདིའི༔
འཆང་བྱེད་སྣོད་ལྡན་ཆོས་ཀྱི་བདག་པོ་ནི༔
གསང་ཆེན་སྙིང་ཐིག་མན་ངག་བསྟན་པའི་བདག༔
ཆོས་དབྱིངས་གནས་སུ་ཀུན་ཏུ་བཟང་མོ་དང་༔
པོ་ཏཱ་ལ་རུ་ཨརྱ་ཏཱ་རེ་མ༔
དཔལ་རི་པདྨ་ཡེ་ཤེས་མཚོ་རྒྱལ་སྟེ༔
ཨོ་རྒྱན་གཟུངས་མ་ད་ལྟའི་མཁར་ཆེན་བཟའ༔
སྐྱེ་བ་འདི་ནས་ཆོ་འཕྲུལ་གྲངས་མེད་འགྱེད༔
མ་ཅིག་ལབ་སྒྲོན་སྣང་ས་འོད་དེ་འབུམ༔
ཟུར་མོ་དགེ་འབུམ་ལ་སོགས་དུ་མའི་མཐར༔
བསམ་ཡས་ལྷོ་ཕྱོགས་གྲྭ་ཞེས་གཡོར་པོའི་ཆར༔
མཚན་རྟགས་ལས་ཅན་བཻ་རོའི་སྐྱེ་མཐའ་ཡིས༔
བརྒྱུད་འཛིན་ཌཱཀྐི་སྒྲོན་མའི་མིང་འཆང་མ༔
མདོ་རྒྱུད་ལུང་གི་གདམས་པས་རྒྱུད་ཕྱུག་པའི༔
རབ་འབྱམས་རྒྱུད་སྡེའི་ཕ་མཐར་བརྒལ་བ་འབྱུང་༔
སྔགས་ཀྱི་དོན་སྤྱོད་རྫོགས་ཆེན་རྣལ་འབྱོར་མ༔
དངོས་སམ་ཉམས་སུ་ང་དང་བཀའ་ཡང་བགྲོ༔
ཟླ་ཟེར་སྤྲུལ་པར་ཆད་མཐའ་མི་མངའ་ཡང་༔
དེ་ཕྱིར་མཚོ་རྒྱལ་དངོས་ཀྱི་སྐྱེ་མཐའ་ནི༔
ཞེས་ཀུན་ཏུ་བཟང་མོ། ཨརྱ་ཏཱ་རེ་མ། ཡེ་ཤེས་མཚོ་རྒྱལ། མ་ཅིག་ལབ་སྒྲོན། སྣང་ས་འོད་འབུམ། ཟུར་མོ་དགེ་འདུན་འབུམ། མི་འགྱུར་དཔལ་སྒྲོན་བཅས་གསལ་བར་བསྟན་ཏོ།།
གཞན་ཡང་སྟག་ཤམ་གཏེར་བྱོན་མཚོ་རྒྱལ་གྱི་རྣམ་ཐར་ལས། འཕགས་པ་རྟག་ཏུ་ངུའི་དུས་སུ་ཚོང་དཔོན་གྱི་བུ་མོར་སྐྱེས་པ་ན་བུ་མོ་ལྔ་བརྒྱར་བཅས་པ་ཆོས་འཕགས་ཀྱི་དྲུང་དུ་བྱོན་ནས་ཕྱིར་མི་ལྡོག་པའི་སྨོན་ལམ་ཆེན་པོ་ཐེབས་པས། དེ་ཚེ་འཕོས་ནས་ལོངས་སྐུའི་ཞིང་ཁམས་མང་པོ་ཉུལ་ནས་སླར་བཅོམ་ལྡན་འདས་ཀྱི་དྲུང་དུ་གང་གཱའི་ལྷ་མོ་ཞེས་པར་སྤྲུལ་ནས་བཀའ་བསྡུ་མཛད་ནས། ལོངས་སྐུའི་ཞིང་དུ་ལྷ་མོ་དབྱངས་ཅན་མ་ཞེས་པ་འགྲོ་བ་སྣ་ཚོགས་ཀྱི་དོན་མཛད་ནས་བཞུགས་པའི་དུས་སུ་ཞེས་གསུངས་པས་ན། བྱང་ཆུབ་སེམས་དཔའ་ཆོས་འཕགས་ཀྱི་སྐབས་སུ་ཚོང་དཔོན་བུ་མོ་དང་། བདག་ཅག་གི་སྟོན་པའི་སྐབས་སུ་སྲིང་མོ་གང་གཱའི་ལྷ་མོ། ལོངས་སྐུའི་གནས་སུ་ལྷ་མོ་དབྱངས་ཅན་མའི་རྣམ་རོལ་དུ་ལུང་བསྟན་ཅིང་། གཞན་ཡང་མཁས་དབང་ཨཱ་ནན་ཏཱ་མ་ཏིས་གཏེར་ཆེན་རིན་པོ་ཆེའི་བཀའ་ལས། རྒྱ་གར་དུ་བྲམ་ཟེ་མ་གཟུགས་ཀྱི་ཉི་མ། གྲུབ་ཐོབ་ཀུ་ཀུ་རི་པ། མཁའ་འགྲོ་མ་སུ་ཁ་སིདྡྷི་སོགས་ཀྱི་རྣམ་སྤྲུལ་དུ་ལུང་བསྟན་ཏོ། །རྗེ་བཙུན་མ་ཉིད་མཚོ་རྒྱལ་གྱི་སྤྲུལ་པ་ཡིན་པར་རིག་འཛིན་ཆོས་རྒྱལ་གླིང་པའི་ཕྱག་རྡོར་དྲེགས་པ་འདུལ་མཛད་ལས་ཀྱང་གསལ་པོར་བསྟན་ཏེ།
མཚོ་རྒྱལ་ཡང་སྤྲུལ་ལྕགས་རོང་བླ་མ་མཚོ༔
བྱང་ཆུབ་སེམས་མ་སངས་རྒྱས་བརྒྱུད་འཛིན་རྣམས༔
སྐྱེས་བུ་ཕོ་མོ་བསྟན་པའི་སྲོག་ཤིང་འཛིན༔
ཨོ་རྒྱན་ང་ལ་མོས་ཤིང་ཆོས་བརྒྱུད་སྐྱོང་༔
ཞེས་འབྱུང་བའི་ཕྱིར་རོ། །དེ་ཡང་མཚོ་རྒྱལ་ཡང་སྤྲུལ་ལྕགས་རོང་བླ་མ་མཚོ་ཞེས་པ་ནི། ཡེ་ཤེས་མཚོ༵་རྒྱལ་གྱི་ཡང་སྤྲུལ་ལྕ༵གས་ཁུང་རོ༵ང་ཐའི་གདུང་རིགས་ལས་འཁྲུངས་པའི་བླ༵་མ༵་རྡོ་རྗེ་འཛིན་པ་ཆེན་མོ་མཚོ༵འི་མིང་མཐའ་ཅན་ཞིག་འབྱུང་ཞེས་པའམ། ཡང་ན་ཡེ་ཤེས་མཚོ༵་རྒྱ༵ལ་གྱི་ཡ༵ང་སྤྲུ༵ལ་ཞིག་འདྲ་ལྕགས་ཁུང་རོང་ཐའི་གདུང་རྒྱུད་ལས་གསེར་ལྗོངས་བླ༵་མ་རུ༵ང་གི་བསྟན་པའི་བདག་མོའི་ཚུལ་དུ་འབྱོན་པར་འགྱུར་ཏེ་མིང་གི་མཐའ་མ་ནི་མཚོ༵འི་ཡི་གེ་ཅན་ནོ། །ཞེས་པའོ། །དེ་བཞིན་དུ། དཔའ་བོ་ལས་རབ་གླིང་པའི་ཞལ་སྔ་ནས། ད་སྐབས་གྱ་བཟི་ཇོ་མོ་དགོན་པ་ལ་དངོས་སུ་ཕན་ཆེན་པོ་མི་ཐོགས་ཀྱང་། མ་འོངས་པ་ན། ཁོང་གི་ཚ་མོ་ཞིག་གིས་འགྲོ་དོན་རྒྱ་ཆེན་བསྒྲུབ་འོང་གསུངས་པ་དེ། ཁོང་གི་སྐུ་སྐྱེ་ཕྱི་མ་ལ་དགོངས་པ་ཡིན་པར་སྣང་ངོ་། །པཎ་ཆེན་བཱི་མ་ལ་མི་ཏྲ་དང་ཀུན་མཁྱེན་ཀློང་ཆེན་རབ་འབྱམས་དབྱེར་མེད་པ་ཡེ་ཤེས་སྒྱུ་མའི་རྣམ་རོལ་མཁན་ཆེན་ངག་གི་དབང་པོའི་ཐུགས་སྲས་ཀྱི་གྲས་སུ་བཞུགས་པ་འོད་གསལ་རྫོགས་པ་ཆེན་པོའི་རྣལ་འབྱོར་པ་མཁན་ཆེན་མུན་སེལ་རིན་པོ་ཆེ་སོགས་རྩོད་མེད་ཀྱི་མཁས་གྲུབ་དུ་མས་སྤྲུལ་པའི་གཏེར་སྟོན་དུ་བསྔགས་པ་རིག་འཛིན་ཨོ་རྒྱན་དྲི་མེད་ཀྱི་གཏེར་ལུང་ལས།
ན་མོ་ཌཱཀྐི་ཀུ་ར་ཏེ་བྷ་ཏྲ་ཡ༔
ཨེ་མ་ཧོ༔
ཆོས་དབྱིངས་ཀུན་ཏུ་བཟང་མོའི་ཐུགས་ཀློང་ནས༔
རོལ་རྩལ་མ་འགགས་བཛྲ་ཝ་ར་ཧི༔
སྤྲུལ་པའི་རྣལ་རོལ་ལྷ་མོ་དབྱངས་ཅན་མ༔
སྐུ་གསུམ་མཁའ་འགྲོའི་རྗེ་མོར་གསོལ་བ་འདེབས༔
གཞན་དོན་ཕྱོགས་མཐར་རྒྱས་པར་བྱིན་གྱིས་རློབས༔
འཕགས་ཡུལ་པུརྞའི་སྲས་མོ་ས་ལེ་བྷེ༔
བོད་ཡུལ་ཡོངས་གྲགས་མཁའ་འགྲོ་དཔལ་ཞེས་གྲགས༔
དངོས་སྤྲུལ་ཡར་ཀླུང་པདྨ་མཚོ་སྐྱིད་ཅེས༔
གཙང་གི་དྲྭ་མཐིལ་མི་འགྱུར་ཆོས་ཀྱི་སྒྲོན༔
ཤར་ལུང་གཙང་སྟོད་སྒྲོལ་མའི་མིང་ཅན་སོགས༔
ལྕམ་དང་སེམས་དཔའི་མཛད་པ་བསམ་མི་ཁྱབ༔
དཔག་མེད་འགྲོ་དོན་མཛད་ལ་གསོལ་བ་འདེབས༔
ཉེས་ཚོགས་འགལ་རྐྱེན་ཞི་བར་བྱིན་གྱིས་རློབས༔
འདི་གོང་དབུས་གཙང་སུ་ཁ་བཛྲ་ཞེས༔
ཞིང་སྣང་དུ་མར་སྤྲུལ་པས་དོན་རབ་མཛད༔
གདུལ་བྱའི་བསོད་ནམས་དཔལ་དུ་ལེགས་འཁྲུངས་ཤིང་༔
ཚུལ་ཁྲིམས་དྲི་བྲལ་རིན་ཆེན་ནོར་བུའི་དབྱིག༔
ཕུན་ཚོགས་གདུལ་དཀའ་འདུལ་ལ་གསོལ་བ་འདེབས༔
བཤད་སྒྲུབ་པད་ཚལ་རྒྱས་པར་བྱིན་གྱིས་རློབས༔
མ་འོངས་དཔལ་རི་པདྨ་འོད་ཞིང་དུ༔
མཐིང་གསལ་འབར་མ་ཌཱ་ཀི་ཟུར་ཕད་འཆང་༔
བདག་སོགས་འཆི་འཕོས་འདུ་བྱེད་དོར་བའི་ཚེ༔
མཛུབ་མོ་ནས་དྲངས་ལམ་སྣ་འཁྲིད་པར་ཤོག༔
ཅེས་གསུངས་པ་བཞིན་ཏེ་ལུང་བསྟན་གཞན་ཡང་མང་ངོ་། །
གཉིས་པ་ནི། དེ་ལ་སྐུ་སྐྱེད་པའི་ཡབ་ནི། པཎ་ཆེན་བཱི་མའི་རྣམ་རོལ་གཡུ་ཁོག་བྱ་བྲལ་ཆོས་དབྱིངས་རང་གྲོལ་གྱིས་བསྟོད་བསྔགས་ཆེར་མཛད་པའི་ཟབ་མོ་བཅོད་ཡུལ་གྱི་གྲུབ་ཐོབ་ཆེན་པོ་ཨ་པང་ཚུལ་བློ་ཡི་སྲས་བརྒྱུད་ཞིང་ལོའམ། བཀྲ་ཤིས་རྒྱ་མཚོ་ཞུ་བ་དང་། མ་ཡུམ་ལྕགས་རྐོང་ཁྲག་འཐུང་བདུད་འཇོམས་རྡོ་རྗེའི་གདུང་བརྒྱུད་ལྕགས་རྐོང་པད་ཏེའི་སྲས་མོ་དང་། ༧ཆོས་རྗེ་ཡིད་བཞིན་ནོར་བུའི་ལྕམ་སྲིང་བྱང་ཆུབ་སེམས་མ་ཆེན་མོ་མེ་སྒྲོན་གཉིས་ཀྱི་སྲས་མོར་རབ་བྱུང་བཅུ་དྲུག་མེ་རྟ་ལོ། སྤྱི་ལོ་༡༩༦༦ལོ་སྤྲེལ་ཟླའི་ཚེས་༢དགུང་མོ་དབང་གི་དུས་སུ་གསེར་ལྗོངས་བླ་མ་རུང་གི་བྱང་ཕྱོགས་བདེ་འཇམ་ཡངས་པའི་ལུང་ཆེན་འཛི་ཆེན་ཁྱུང་ཤར་དུ་སྐུ་བལྟམས། ནམ་མཁའི་དབྱིངས་སུ་འཇའ་སྤྲིན་ཁ་དོག་སྣ་ལྔས་ཁེངས་པ་དང་། ༧ཆོས་རྗེ་ཡིད་བཞིན་ནོར་བུས་འཇམ་དཔལ་སྙིང་པོ་མུ་ཡིག་དུང་ཕྱུར་གཅིག་བསྙེན་མཚམས་མཐར་འཁྱོལ་བ་དང་མཉམ་དུ་སྐུ་འཁྲུངས་པས། མུ་མཚོ་ཞེས་མཚན་གསོལ། དེ་ཡང་ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་རྣམ་གཉིས་ལས་དང་སྨོན་ལམ་གྱི་འབྲེལ་བ་དམིགས་བསལ་ཅན་ལ་བརྟེན་ནས་སྐྱེས་རབས་ནོར་བུའི་ཕྲེང་བར་མཉམ་དུ་འགྲོ་དོན་མཛད་པ་ཡིན་ཏེ། རྗེ་འབངས་ཉེར་ལྔའི་སྐབས་སུ་འབངས་དང་གྲོགས་ཀྱི་ཚུལ་དུ་བྱོན་ཏེ། འབངས་སྣ་ནམ་རྡོ་རྗེ་བདུད་འཇོམས། གྲོགས་མཁའ་འགྲོ་ཡེ་ཤེས་མཚོ་རྒྱལ། རྒྱལ་དབང་ལྔ་པའི་སྐབས་སུ་བླ་སློབ་ཀྱི་ཚུལ་དུ་བྱོན་ཏེ། བླ་མ་རྡོ་བྲག་ པདྨ་འཕྲིན་ལས། སློབ་མ་མི་འགྱུར་དཔལ་སྒྲོན། རྒྱལ་དབང་བཅུ་གསུམ་པའི་སྐབས་སུ་ཡབ་ཡུམ་གྱི་ཚུལ་དུ་བྱོན་ཏེ། ཡབ་གཏེར་ཆེན་ལས་རབ་གླིང་པ། ཡུམ་མཁའ་འགྲོ་མ་བོ་མོ། རྒྱལ་དབང་བཅུ་བཞི་པའི་སྐབས་སུ་ཚ་ཞང་གི་ཚུལ་དུ་བྱོན་ཏེ། ཞང་པོ་༧ཆོས་རྗེ་ཡིད་བཞིན་ནོར་བུ། ཚ་མོ་རྗེ་བཙུན་མ་མུ་མེད་ཡེ་ཤེས་མཚོ་མོའོ། །སླད་ནས་ཀྱང་། སྐུ་ཚེ་བསྐལ་པ་རྒྱ་མཚོར་འཚོ་ཞིང་བཞེས་ནས་ཇི་སྲིད་འཁོར་བའི་རྒྱ་མཚོ་དོང་ནས་མ་སྤྲུགས་བར་དུ་བསྟན་དང་འགྲོ་བའི་དོན་དུ་སྨན་པའི་མཛད་པ་རྒྱུན་ཆགས་སུ་འབྱུང་བ་ནི་སེམས་དཔའ་ཆེན་པོའི་ཁྱད་ཆོས་སོ། །
སྲས་མོ་ཉིད་མ་ཡུམ་གྱི་ལྷུམས་སུ་བཞུགས་སྐབས། སྐུ་ལུས་ལ་ཟག་མེད་ཀྱི་བདེ་བས་ཁྱབ་ཅིང་། སྐུ་མ་འཁྲུངས་བར་དུ་གཞན་སུས་ཀྱང་མ་ཡུམ་ལ་མངལ་ཆགས་པ་མ་ཤེས་སོ། །སྐུ་འཁྲུངས་ནས་ཉིན་གསུམ་གྱི་བར་དུ་ནུ་ཞོ་མ་བཞེས་པར་བཞུགས་ཤིང་། དུས་རྒྱུན་དུ་གཟིམ་མལ་དུ་ཆབ་བསང་མི་འདོར་བ་དང་། བྱིས་པ་ཆུང་ངུའི་སྐབས་ཀྱང་སྐུ་ལུས་དྲང་པོར་བསྲང་ནས་བཞུགས་ལ། ཞལ་ནས་ཨ་མ་བརྗོད་མ་ཤེས་གོང་ནས་རིག་སྔགས་ཀྱི་རྒྱལ་པོ་ཨ་ར་པ་ཙ་རྒྱུན་དུ་འདོན་ནུས་པ་དང་། གཟིམ་ངོགས་ནས་ཀྱང་ཨ་ར་པ་ཙ་ཞལ་འདོན་གནང་བས། གཞན་དག་གི་སྲས་མོ་གཟིམ་ཁུག་འདུག་སྟེ། ཨ་ར་པ་ཙ་འདོན་གྱིན་གདའ་ཟེར་བ་བྱུང་།
ཡ་ཆེན་ཁ་ལ་བཞུགས་སྐབས། ཉིན་རེ་ལ། སངས་རྒྱས་མྱ་ངན་མེད་པའི་མཚན་སྔགས་ལྔ་སྟོང་རེ་ཞལ་འདོན་མཛད། གལ་ཏེ་ལྔ་སྟོང་འདོན་མ་གྲུབ་ཚེ་ཞལ་ནག་ལྷང་ངེར་བཞུགས་ལ། གྲུབ་ཚེ་ཞལ་རས་འཛུམ་དཀར་ངོམ་བཞིན་བཞུགས། ཤིང་སྤེལ་མའི་ལོ་འདབ་རེ་རེའི་སྟེང་དུ་སངས་རྒྱས་མྱ་ངན་མེད་པའི་སྐུ་མང་པོ་ཤར་བ་མཇལ་ཞིང་དགུང་ལོ་གསུམ་ཙམ་ལོན་སྐབས། མ་ཡུམ་གསེར་རྟ་རྫོང་ལ་ཚོགས་འདུ་འགྲོ་དགོས་བྱུང་སྐབས། མ་ཡུམ་གྱི་རིམ་ལ་བཀྲ་ཤིས་བརྒྱད་པ་བསླབས་མ་དགོས་པ་རང་བཞིན་གྱིས་དགོངས་ནས། ཟངས་ཀྱི་ཀ་ཏོ་རའི་ནང་བཀྲ་ཤིས་བརྒྱད་པ་ཚར་རེ་གྲུབ་ཚེ་ར་ལུག་རིལ་མ་རེ་འཕངས་ནས་སྣོད་མ་གང་བར་གསུངས། དགུང་ལོ་དྲུག་པ་ནས་ཕྱིས་འབྱུང་གི་ལུང་བསྟན་རྣམས་ཐོགས་མེད་དུ་གསུངས། ར་རྫི་ལ་བྱོན་སྐབས་གཅན་གཟན་དྲེད་མོ་དང་སུ་མགྱོགས་ལྟ་བ་དང་། སྤྱང་ཀིས་དང་ལྷན་དུ་བྱོན་ནས་སྤྱང་ཀིས་ཟོས་ཚར་ཡོད་བསམས་ཀྱང་བདེ་བར་ཁྱིམ་ལ་སླེབས་པ་ངོ་མཚར་བ་བྱུང་།
ཆུ་ཉ་ལ་བཞུགས་སྐབས། གཏེར་ཆེན་ལས་རབ་གླིང་པ་དང་རྒྱལ་དབང་ཐུབ་བསྟན་རྒྱ་མཚོ་རྣམ་གཉིས་ཀྱིས་ལྷན་དུ་ལྷ་ལྡན་གཙུག་ལག་ཁང་གི་རྟེན་གྱི་གཙོ་བོའི་ཐུགས་ཀ་ནས་བཞེས་པའི་གཏེར་བྱོན་ཁྱད་པར་ཅན་རྡོ་རྗེ་ཕག་མོའི་སྐུ་བརྙན་དེས་རྗེ་བཙུན་མ་མུ་མཚོ་ལ་ཤིན་ཏུ་དགྱེས་པའི་རྣམ་འགྱུར་བསྟན་ཏེ། སྐུ་ཡི་གར་སྟབས་ལིང་ལིང་དུ་བསྒྱུར་ཅིང་། གསུང་གི་བཞད་སྒྲ་ཧ་རི་ནི་ས་སོགས་མཁའ་འགྲོའི་བརྡ་སྐད་མང་པོ་བསྒྲགས་པ་དེར་ཡོད་ཀྱི་དཔལ་མཛོད་དང་ཚེ་བྷྲུཾ་སོགས་བྱིས་པ་མང་པོས་མཇལ། དེ་ལ་བརྟེན་ནས་རྗེ༵་མཙུ༵ན་ཕ༵ག་མོ༵་བཞ༵ད་པ༵་ཞེས་མཚན་གྱི་སྙན་གྲགས་ཕྱོགས་སུ་ཁྱབ། དགུང་གྲངས་བཅུ་གསུམ་ནས་ཡི་དམ་བསྙེན་ཚད་དུང་ཕྱུར་གཅིག་ཞལ་འདོན་ལེགས་པར་གྲུབ།
༧ཆོས་རྗེ་ཡིད་བཞིན་ནོར་བུའི་མདུན་ནས་ཀློག་བསླབས་པས་དཀའ་ཚེགས་མེད་པར་ཐུགས་སུ་ཆུད། ཉིད་ཀྱི་བསླབ་བྱ་ཐར་ལམ་རབ་སྣང་ལས།
ལྔ་ཚན་ཡོན་ཏན་ལྡན་པའི་མཁན་སློབ་ལས།།
སྤོང་བཞི་སྤོང་བདུན་སོ་ཐར་སྡོམ་པ་ནོད།།
དེ་ཡང་ངེས་འབྱུང་མེད་ན་མི་སྐྱེ་བས།།
སྲིད་ལས་ངེས་པར་འབྱུང་བའི་བསམ་པ་གལ།།
ཞེས་གསུངས་པ་བཞིན། དགུང་ལོ་བཅུ་བདུན་པར་སྲིད་ལས་ངེས་པར་འབྱུང་བའི་བསམ་བ་དྲག་པོས་ཐུགས་རྒྱུད་བསྐུལ་ཞིང་། ལྷག་པ་ཚུལ་ཁྲིམས་ཀྱི་བསླབ་པ་རིན་པོ་ཆེ་ཡོན་ཏན་ཐམས་ཅད་ཀྱི་གཞི་དང་རྩ་བར་མཐོང་ནས། བརྟན་མཁས་ཀྱི་ཡོན་ཏན་དང་ལྡན་པའི་མཁན་པོ་བརྩོན་འགྲུས་གྲགས་པའི་མདུན་ནས་དགེ་ཚུལ་མའི་སྡོམ་པ་རྣམ་པ་དག་པ་བཞེས་ནས་བཟུང་། མིག་འབྲས་བཞིན་དུ་གཅེས་པར་བསྲུངས་དང་སྲུང་བཞིན་པ་ལགས་སོ། །
གསན་བསམ་མཛད་ཚུལ་ནི། ཁམས་གསུམ་ཆོས་ཀྱི་རྒྱལ་པོ་སྐྱབས་རྗེ་ཡིད་བཞིན་ནོར་བུའི་ཞལ་དྲུང་ནས་དགེ་ཚུལ་ཀཱ་རུ་ཀ རྒྱལ་སྲས་ལག་ལེན་ལན་བཞི། མི་ཉག་ཀུན་བཟང་ཆོས་གྲགས་ཀྱི་རྒྱལ་སྲས་ལག་ལེན་གྱི་འགྲེལ་བ། སྔོན་འགྲོ་ཀུན་བཟང་བླ་མའི་ཞལ་ལུང་ལན་བཞི། འདུལ་བ་མཚོ་ཆེན། འདུལ་བ་མེ་ཏོག་ཕྲེང་རྒྱུད། སྡོམ་གསུམ་རྣམ་ངེས་ལན་གཉིས། རྒྱལ་པོ་ལུགས་ཀྱི་བསྟན་བཅོས་ལན་གསུམ། མངོན་པ་མཛོད་ཀྱི་རྩ་བ། མངོན་པ་མཆིམས་ཆེན། མི་ཕམ་རིན་པོ་ཆེའི་མཁས་འཇུག་ལན་གསུམ། མི་ཕམ་རིན་པོ་ཆེའི་མངོན་པ་མཛོད་ཀྱི་འགྲེལ་བ། མངོན་པ་ཀུན་བཏུས། ཚད་མ་རིགས་གཏེར། ས་པཎ་ཚད་མ་རིགས་གཏེར་རང་འགྲེལ། མི་ཕམ་རིན་པོ་ཆེའི་ཚད་མ་རིགས་གཏེར་འགྲེལ་བ། བློ་གཏེར་དབང་པོའི་ཚད་མ་རིགས་གཏེར་འགྲེལ་བ་ལན་གསུམ། མཁས་གྲུབ་དགེ་ལེགས་དཔལ་གྱི་ཚད་མ་སྡེ་བདུན་ཡིད་ཀྱི་མུན་སེལ། ཚད་མ་རྣམ་འགྲེལ་འགྲེལ་ཆེན་མི་ཕམ་རིན་པོ་ཆེའི་གསུང་བཅས་གསན། གཞན་ཡང་། དབུ་མ་འཇུག་པའི་རྩ་བ། དབུ་མ་འཇུག་འགྲེལ་ཟླ་བའི་ཞལ་ལུང་མི་ཕམ་རིན་པོ་ཆེའི་གསུང་། དབུ་མ་རྒྱན་འགྲེལ་འཇམ་དབྱངས་བླ་མའི་ཞལ་ལུང་ལན་གསུམ། ངེས་ཤེས་སྒྲོན་མེ་ལན་བཞི། འཇུག་འགྲེལ་ཟླ་བའི་འོད་ཟེར། བློ་གཏེར་དབང་པོའི་འཇུག་པ་མཆན་འགྲེལ། མི་ཕམ་རིན་པོ་ཆེའི་མདོ་སྡེ་རྒྱན་གྱི་འགྲེལ་བ། ཤེར་ཕྱིན་རྩ་བ། ཤེར་ཕྱིན་སྤྱི་དོན་དཔལ་སྤྲུལ་རིན་པོ་ཆེའི་གསུང་། འགྲེལ་ཆུང་དོན་གསལ། མི་ཕམ་རིན་པོ་ཆེའི་པུཎྜ་རི་ཀ སྡུད་པ་རྒྱན་སྦྱར། མདོ་སྡུད་པའི་འགྲེལ་བ། མི་ཕམ་རིན་པོ་ཆེའི་རྒྱུད་བླ་འགྲེལ་བ། རྗེ་བདག་ཉིད་ཆེན་པོའི་བྱང་ཆུབ་ལམ་རིམ་ཆེན་མོ། ཆུང་བ་བཅས་ཀྱི་ཁྲིད་ལུང་། སྒྱུ་འཕྲུལ་སྐོར་ལ། གསང་སྙིང་རྩ་བ། རྒྱ་སྐོང་མཆན་འགྲེལ་ཀུན་མཁྱེན་ཞལ་ལུང་ལན་དྲུག གསང་འགྲེལ་ཕྱོགས་བཅུ་མུན་སེལ་ལན་གཉིས། ཡིད་ཀྱི་མུན་སེལ། མ་རིག་མུན་སེལ། གསང་སྙིང་སྤྱི་དོན་འོད་གསལ་སྙིང་པོ་ལན་གསུམ། གསང་སྙིང་སྤྱི་དོན་མཛོད་ཀྱི་ལྡེའུ་མིག་ལན་གཉིས་གསན། འོད་གསལ་རྫོགས་པ་ཆེན་པོའི་སྐོར་ལ། ཀློང་ཆེན་མཛོད་བདུན། ངལ་གསོ་སྐོར་གསུམ། རང་གྲོལ་སྐོར་གསུམ། ཁྲིད་ཡིག་ཡེ་ཤེས་བླ་མ་ལན་གཉིས། ལྕེ་བཙུན་སྙིང་ཐིག་འགྲེལ་བ་འཇམ་མགོན་ཀོང་སྤྲུལ་རིན་པོ་ཆེའི་གསུང་། ལྕེ་བཙུན་སྙིང་ཐིག་གི་འགྲེལ་བ་ལས་རབ་གླིང་པའི་གསུང་ལན་གཉིས། བླ་མ་ཡང་ཏིག་ལན་གསུམ། སྨིན་གླིང་གཏེར་བདག་གླིང་པའི་སྙིང་ཐིག་ཁྲིད་ཡིག་ལན་གསུམ། ཀར་གླིང་ཞི་ཁྲོའི་བར་དོ་དྲུག་ཁྲིད་ལན་གཉིས། ༧ཆོས་རྗེ་ཡིད་བཞིན་ནོར་བུའི་དགོངས་གཏེར་ཁྲིད་ཡིག་སངས་རྒྱས་ལག་སྟེར། བྱང་གཏེར་དགོངས་པ་ཟང་ཐལ། ཞབས་དཀར་ཚོགས་དྲུག་རང་གྲོལ་གྱི་ཁྲིད་ཡིག་མཁའ་ལྡིང་གཤོག་རླབས་རྣམས་དང་། སྙིང་ཐིག་ཡ་བཞིའི་དབང་ལན་གསུམ། དུས་འཁོར་དབང་མོ་ཆེ་རྗེ་བཙུན་ཇོ་ནང་པའི་ལུགས་རྒྱས་པ། དུས་འཁོར་དབང་མི་ཕམ་རིན་པོ་ཆེའི་ཆོག་བསྒྲིགས་ལན་གསུམ། ལས་རབ་གླིང་པའི་དུས་འཁོར་དབང་ལན་གསུམ་བཅས་གསན་བཞེས་མཛད། རྒྱལ་དབང་ཐམས་ཅད་མཁྱེན་པའི་མདུན་ནས། རྒྱལ་དབང་ལྔ་པ་ཆེན་པོའི་དག་སྣང་རྒྱ་ཅན་ཉེར་ལྔའི་སྙིང་པོ་ཐུགས་སྒྲུབ་ཡང་སྙིང་ཀུན་བཏུས་ཀྱི་དབང་ཆེན་ཟབ་རྒྱས་དང་། ཐུགས་རྗེ་ཆེན་པོ་དཔའ་མོ་ལུགས་ཕྱག་སྟོང་སྤྱན་སྟོང་གི་བཀའ་དབང་དང་། དཔལ་གསང་བ་འདུས་པ་འཕགས་ལུགས་མི་བསྐྱོད་རྡོ་རྗེའི་བཀའ་དབང་དང་། སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་ཚེ་དབང་བཅས་ནོད། མཁན་པོ་སྒེག་པའི་མདུན་ནས། མི་ཕམ་རིན་པོ་ཆེའི་དུས་འཁོར་འགྲེལ་ཆེན་ཁྲིད་ལུང་དང་། སྤྲུལ་སྐུ་བདེ་ཆེན་མདུན་ནས། ལས་གླིང་ཟབ་གཏེར་ཆ་ཚང་དབང་ལུང་ཐོབ། བླ་མ་ཨ་འཇམ་མདུན་ནས། སྨིན་གླིང་འདོད་འབྱུང་བུམ་བཟང་དབང་ལུང་ཆ་ཚང་། བླ་མ་ཀར་ཆོས་མདུན་ནས་བྱང་གཏེར་དགོངས་པ་ཟང་ཐལ་དབང་ལུང་ཆ་ཚང་དང་། མཁན་པོ་དེས་པའི་མདུན་ནས། གསང་སྙིང་སྤྱི་དོན་འོད་གསལ་སྙིང་པོ་དང་། མཁན་པོ་ཉིད་ཀྱིས་བརྩམས་པའི་དབུ་མ་འཇུག་པའི་འགྲེལ་བ་དང་། མི་ཕམ་རིན་པོ་ཆེའི་དབུ་མ་རྒྱན་འགྲེལ་བ་བཅས་མདོར་ན། བླ་མ་དམ་པ་རྣམས་ལས། མདོ་སྔགས་རིག་པའི་གནས་དང་བཅས་པ་དང་། སྨིན་བྱེད་དབང་། གྲོལ་བྱེད་ཁྲིད། རྒྱབ་རྟེན་ལུང་སོགས། ཁྱད་པར་དུ་གསང་ཆེན་སྔ་འགྱུར་རྙིང་མའི་རྒྱུད་ལུང་མན་ངག་ཐམས་ཅད་བུམ་པ་གང་བྱོས་ཀྱིས་ཚུལ་དུ་ལེགས་པར་ཐོབ་པ་ཡིན་ནོ།།
འགྲོ་དོན་གྱི་ཐོག་མར་ཉག་ཨ་ཛི་རོང་དུ་གྲུབ་ཆེན་པདྨ་བདུད་འདུལ་གྱི་ལུང་དོན་བཞིན། གྱ་བཟི་ཇོ་མོ་མཚོ་རྒྱལ་དགོན་དུ། མི་འཇིགས་གདོང་ལྔས་བཏེགས་པའི་གསེར་ཁྲི་ལ་མངའ་གསོལ་སྐབས་སུ་རྒྱལ་སྲས་ལག་ལེན་སོ་བདུན་མ་ལྗགས་ལུང་གནང་བ་ནས་བཟུང་། བཙུན་མ་རྣམས་ལ་རྒྱལ་སྲས་ལག་ལེན་ལན་གསུམ། ཆོས་བཞིན་རིན་པོ་ཆེའི་ཕྲེང་བ། བྱང་སེམས་ནོར་བུའི་ཕྲེང་བ་ལན་གསུམ། དཔལ་སྤྲུལ་སྔོན་འགྲོ་ཀུན་བཟང་བླ་མའི་ཞལ་ལུང་ལན་གསུམ། བྱང་སེམས་སྤྱོད་འཇུག་འཇུག་ཆེན་མོ་ལན་གསུམ། མི་ཕམ་རིན་པོ་ཆེའི་མཁས་འཇུག་ལན་གསུམ། ངེས་ཤེས་རིན་པོ་ཆེའི་སྒྲོན་མེ། དབུ་མ་འཇུག་པའི་འགྲེལ་བ། སེམས་ཉིད་ངལ་གསོ། གསང་སྙིང་སྤྱི་དོན་འོད་གསལ་སྙིང་པོ། ཡིད་ཀྱི་མུན་སེལ། མ་རིག་མུན་སེལ། མན་ངག་མཛོད་རྣམས་ཀྱིས་མཚོན་སྔ་ཕྱིར་ཆོས་བཀའ་མང་དུ་གསུངས་སོ།།
སྤྱི་ལོ་༡༩༨༥བོད་ཤིང་གླང་ལོར། ༧ཆོས་རྗེ་ཡིད་བཞིན་ནོར་བུའི་སྐུ་སྐྱེ་གོང་མ་ལས་རབ་གླིང་པའི་གདན་ས་དང་། རྗེ་བཙུན་མ་མུ་མཚོ་རིན་པོ་ཆེའི་སྐུ་སྐྱེ་གོང་མ་མཁའ་འགྲོ་བོ་མོའི་གདན་ས་ཉག་རོང་ཤར་རྒྱལ་བ་སྐལ་བཟང་དགོན་དུ་ཕེབས། འདིའི་སྐབས་སུ་རྗེ་བཙུན་མ་མུ་མེད་ཡེ་ཤེས་མཚོ་མོ་ལ་མཁའ་འགྲོ་བོ་མོའི་སྔོན་གནས་རྗེས་དྲན་གྱི་དག་སྣང་མང་ཙམ་ཡོད་ཀྱང་རེ་ཞིག་གསང་རྒྱ་བསྡམས་སོ།།
སྤྱི་ལོ་༡༩༨༧བོད་མེ་ཡོས་ལོར། རྗེ་བཙུན་མ་མུ་མེད་ཡེ་ཤེས་མཚོ་མོ་གཙོས་བོད་མི་ཁྲི་གཅིག་ཆོས་རྗེ་ཡིད་བཞིན་ནོར་བུའི་སྐུ་རྗེས་འབྲངས་ཏེ་རྒྱ་ནག་རི་བོ་རྩེ་ལྔ་ལ་གནས་མཇལ་དུ་བྱོན། སྤྱི་ལོ་༡༩༨༨བོད་ས་འབྲུག་ལོར་ཉག་ཤང་ལང་བྲག་དཀར་ལ་གནས་འདུས་ཀྱི་དུས་སུ་སླར་འཁོར་འདུས་པ་དུ་མ་དང་ལྷན་དུ་ཆོས་རྗེ་ཡིད་བཞིན་ནོར་བུའི་ཞབས་འབྲིང་དུ་ཉག་རོང་ལ་བྱོན། དེ་ནས་ཉག་རོང་གྱ་བཟི་བདེ་ཆེན་གསང་སྔགས་ཆོས་གླིང་དུ་ཕེབས་ནས། དེར་ཞག་བཞུགས་ གནང་། ཉག་བླ་ཡེ་ཤེས་རྡོ་རྗེས་མཛད་པའི་ཉག་བླ་པདྨ་བདུད་འདུལ་གྱི་རྣམ་ཐར་སྐབས་དབྱེ་དགུ་པ་བསྟན་པ་དང་འགྲོ་བའི་དོན་དུ་བསོད་ནམས་ཀྱི་ཞིང་ས་གཙུག་ལག་ཁང་དུ་བཞེངས་ཚུལ་ལས། དེ་ནས་ཉག་ཡུལ་གྱ་བཟི་ཞེས་པ་ལ་བྱོན་ཏེ། སྔར་མེད་པའི་གྲྭ་ཚང་གསར་དུ་བསྡུས་ནས། ས་གཞིར་བྱིན་གྱིས་བརླབས་ཏེ་མཁར་སྐྱ་བ་ལ་གསང་སྔགས་བདེ་ཆེན་ཆོས་གླིང་དགོན་མིང་བཏགས། ཇོ་མོ་དགོན་གསར་བཏབ་ནས། མཚོ་རྒྱལ་དགོན་མིང་བཏགས་པར་མཛད། དེ་གཉིས་ཀྱིས་གཙུག་ལག་ཁང་དང་གྲྭ་ཁང་གསར་དུ་བཏབ། དགོན་གནས་དེ་གཉིས་ལ་རྟེན་བཞག་རྒྱས་པར་མཛད་ནས། ཕྱིས་སུ་དགོན་པ་འདི་གཉིས་བསྟན་པ་དར་ཞིང་རྒྱས་པར་འབྱུང་བར་ལུང་བསྟན་པ་ནི། མ་འོངས་པ་ན། མཚོ་རྒྱལ་དངོས་ཀྱི་རྣམ་འཕྲུལ་ཞིག་དགོན་པ་འདིར་འབྱོན་འོང་བས། ཇོ་མོ་མཚོ་རྒྱལ་དགོན་ཞེས་མཚན་གསོལ། དེའི་དུས་སུ་ཉག་ཆུ་ཕར་ཁར་ཇི་ཐུ་རིའི་མཐའ་ནས་ལམ་ཆེན་གསར་པ་བྱས་ཏེ། ལམ་དེའི་སྟེང་ན་ཚོང་པ་མང་པོ་གཤར་བའི་དུས་དེར། དགོན་པ་འདིའི་ཟུར་ན་ལྕགས་ཟམ་འཛུགས། ཟམ་དེའི་ཕ་རོལ་ན་རྒྱ་གྲོང་ཁྲ་ཆེམ་ཆེམ་བྱས་པ་འོང་། ཟམ་པ་དེའི་སྟེང་ན་མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་རོལ་དངོས་སུ་བྱོན་པ་དང་། མཁའ་འགྲོ་མའི་སྟེང་ན་རྨ་བྱའི་གདུགས་ཕུབ། འོག་ནས་སེང་གེ་དཀར་མོའི་ཁྲི་བརྩེགས་ནས་ཆོས་ཀྱི་འཁོར་ལོ་བསྐོར་བས་ན། དེ་ཡི་དུས་སུ་རྟའུ་ཉི་མཚོ་དགོན་ཡན་ཆད་ཀྱི་བཙུན་མ་རྣམས་འདུས་པས། དང་པོ་ཇོ་མོ་བརྒྱ་དང་བཅུ་གསུམ་དང་། རིམ་བཞིན་འཕེལ་ནས་ཇེ་མང་དུ་འགྲོ། ཇོ་མོ་རྟོགས་པ་མཐོན་པོར་གྱུར་ནས་འཇའ་ལུས་པ་མང་པོ་འབྱུང་བར་གསུངས་སོ། །
གོང་གི་གྲུབ་དབང་པདྨ་བདུད་འདུལ་གྱི་ལུང་དོན་བཞིན། ཇོ་མོ་མཚོ་རྒྱལ་དགོན་གྱི་ཆུའི་ཕར་ཁར་ཇི་ཐུ་རིའི་མཐའ་ནས་ལམ་ཆེན་འདོན་པ་དང་། ལམ་དེའི་སྟེང་ནས་ཚོང་པ་མགྲོན་པོ་མང་པོ་གཤར་བ་དང་། ཟུར་ལ་ལྕགས་ཟམ་བཙུགས་ཡོད་པ་དང་། ལྕགས་ཟམ་ཕ་རོལ་རྒྱ་གྲོང་ཆགས་ཡོད་པ་སོགས་ལ་ཁུངས་བཅོལ་ཏེ། མཁའ་འགྲོ་ཡེ་ཤེས་མཚོ་རྒྱལ་གྱི་སྐུ་སྐྱེ་འཁྲུལ་བྲལ་ཡིན་པ་ཐུགས་ཐག་བཅད་ནས། གྱ་བཟི་ཇོ་མོ་མཚོ་རྒྱལ་དགོན་དུ་ཕུན་སུམ་ཚོགས་པ་ལྔའི་སྒོ་ནས་སྟེང་ལ་རྨ་བྱ་སྔོན་མོའི་གདུགས་ཕུབ། འོག་ཏུ་སེང་གེ་དཀར་པོའི་ཁྲི་བརྩེགས་ཏེ་གསེར་ཁྲིར་མངའ་གསོལ་མཛད། དེ་ཡང་གནས་ཕུན་སུམ་ཚོགས་པ་གྲུབ་ཆེན་པདྨ་བདུད་འདུལ་རྡོ་རྗེའི་ལུང་གིས་ཟིན་པའི་ཇོ་མོ་མཚོ་རྒྱལ་དགོན། སྟོན་པ་ཕུན་སུམ་ཚོགས་པ་མཁའ་འགྲོ་ཡེ་ཤེས་མཚོ་རྒྱལ་གྱི་ཡང་སྲིད་མུ་མེད་ཡེ་ཤེས་མཚོ་མོ། དུས་ཕུན་སུམ་ཚོགས་པ་མཉམ་མེད་ཐུབ་པའི་དབང་པོས་ཆོས་འཁོར་ཐོག་མ་བསྐོར་བའི་དུས་ཆེན་བོད་ཟླ་དྲུག་པའི་ཚེས་བཞི། ཆོས་ཕུན་སུམ་ཚོགས་པ་རྒྱལ་སྲས་རྣམས་ཀྱི་ལག་ལེན་གནད་དུ་དྲིལ་བའི་གདམས་པ་དངུལ་ཆུ་ཐོགས་མེད་ཀྱི་ཐུགས་དམ་གྱི་ཡང་ཞུན་བཅུ་ཕྲག་གསུམ་ལ་ཉག་མ་བདུན་གྱིས་མཛེས་པའི་ཨུ་པ་དེ་ཤའོ། །འཁོར་ཕུན་སུམ་ཚོགས་པ་ལུང་ཟིན་གྱི་ཇོ་མོ་བརྒྱ་དང་བཅུ་གསུམ་གཙོས་དད་ལྡན་སེར་སྐྱ་རྣམས་སོ། །ལས་རབ་གླིང་པའི་ཚ་མོ་ཞེས་གསུངས་པ་ཡང་སྐུ་སྐྱེ་ཕྱི་མ་རྗེ་བཙུན་མ་མུ་མཚོ་འདི་ལ་དགོངས་པ་གོང་བཞིན་སྨྲོས་མ་དགོས་སོ། །དེ་ནས་ཉག་རོང་གི་དགོན་ཁག་བཅུ་གཅིག་ཙམ་དུ་ཕེབས་ནས་སྐྱེ་འགྲོ་རྣམས་ཐར་པའི་ལམ་སྣ་ཟིན་པར་བྱས་སོ། །
དེ་ཡང་སྔོན་ཚེ་བཀའ་བབས་བདུན་ལྡན་འཇམ་དབྱངས་མཁྱེན་བརྩེ་པདྨ་འོད་གསལ་མདོ་སྔགས་གླིང་པའི་ཞལ་སྔ་ནས་ལས་རབ་གླིང་པ་ལ་ཉིད་ཀྱི་མཁའ་འགྲོ་བོ་མོ་དེ། བདག་གི་རྩ་བའི་བླ་མ་ཨོ་རྒྱན་སྨིན་གྲོལ་གླིང་གི་རྗེ་བཙུན་མ་འཕྲིན་ལས་ཆོས་སྒྲོན་གྱི་སྐུ་སྐྱེ་ཡིན་པས། དེང་ཕྱིན་ཆད་འཕྲིན་ལས་ཆོས་སྒྲོན་དུ་མཚན་གསོལ་དགོས་གསུངས། ཕྲིན་ལས་ཆོས་སྒྲོན་ནི་མི་འགྱུར་དཔལ་སྒྲོན་གྱི་ཡང་སྲིད་དང་གདུང་བརྒྱུད་ཀྱི་ཚ་མོ་གཉིས་ཀ་ཡིན་པས། དེ་ཉིད་ཀྱི་ཡང་སྲིད་འཁྲུལ་བྲལ་རྗེ་བཙུན་མ་མུ་མཚོ་རང་ཡིན་པར་ཡིད་ཆེས་རྙེད་དེ། སྤྱི་ལོ་༡༩༨༩བོད་ས་སྦྲུལ་ལོར་ཤར་རྒྱལ་བ་སྐལ་བཟང་དགོན་གྱི་གསེར་ཁྲི་ལ་བཀོད་དེ། རྟེན་གསུམ་མཎྜལ་གྱ་ནོམ་པ་ཕུལ་ནས་བསྟན་པའི་བདག་མོར་མངའ་གསོལ་ཏོ། །
དེ་ཡང་ལྷ་མིའི་རྣམ་འདྲེན་༧གོང་ས་སྐྱབས་མགོན་སྐུ་འཕྲེང་བཅུ་བཞི་པ་ཆེན་པོའི་སྔོན་གྱི་ལས་སྨོན་དུས་སུ་སད་དེ་ཐུགས་བཞེད་བླ་ན་མེད་པའི་གསོས་སུ་སྐྱབས་རྗེ་གྲུབ་དབང་པདྨ་ནོར་བུ་མཆོག་ནས་འགྲོ་གྲོན་བཏང་སྟེ་སྔོན་རྗེས་སུ་ཆོས་རྗེ་མཆོག་ལ་གདན་ཞུས་ལྟར། སྤྱི་ལོ་༡༩༩༠ཟླ་༧ཚེས་༡༦ལ་འཕགས་ཡུལ་བཞུགས་སྒར་དྷ་རཾ་ས་ལར་རྩེ་རྣམ་རྒྱལ་གྲྭ་ཚང་འདུས་སྡེ་བྱིངས་ནས་བསུ་བ་ཟབ་རྒྱས་དང་བཅས་ཞབས་སོར་བཀོད། ཚེས་དེ་ཉིན་གུང་༧གོང་ས་སྐྱབས་མགོན་ཆེན་པོ་མཆོག་ལ་གཟིམ་ཆུང་དུ་ཐོག་མར་མཇལ་བཅར་ཞུ་སྐབས། ཞང་པོ་ཆོས་རྗེ་བླ་མ་མཆོག་གིས་དར་ཉིན་མོ་བདེ་ལེགས་ཀྱིས་མདུན་བདར། སྐུ་གསུང་ཐུགས་ཀྱི་རྟེན་བྱིན་ཅན་དང་། དངོས་རྫས་གྱ་ནོམ་པ་དུ་མ་དང་བཅས་ཞབས་བརྟན་ཚིགས་བཅད་ཀྱི་ཕྲེང་བ་ཕུལ་ཏེ་གུས་ཕྱག་ཏུ་བསྟར། ༧གོང་ས་སྐྱབས་མགོན་ཆེན་པོ་མཆོག་ནས་ཀྱང་། བདག་ཅག་གི་སྟོན་པའི་སྣང་བརྙན་བྱིན་ལེགས་ཤིག་དང་ལྷ་རེག་ཉིན་མོ་བདེ་ལེགས་བཅས་བསྩལ་ཏེ། རིས་མེད་ཀྱི་རྒྱལ་བསྟན་རིན་པོ་ཆེ་འཛིན་སྐྱོང་སྤེལ་གསུམ་གྱི་ཐུགས་ཁུར་ཆེ་བཞེས་དགོས་རྒྱུའི་གསུང་གིས་མངའ་གསོལ་བ་སོགས་སྐྱེ་ཕྲེང་དུ་མར་མཆོད་ཡོན་རྟེན་འབྲེལ་ལེགས་འགྲིགས་ཀྱིས་༧གོང་ས་མཆོག་གི་མཛད་ཕྲིན་བླ་རུ་མཐོ་བ་དང་། རྟེན་འབྲེལ་ཟུར་ཙམ་ཡང་མ་རལ་བ་ལྷ་དང་བཅས་པའི་བསྔགས་ཡུལ་དུ་གྱུར་པ་བཞིན་བསླུ་མེད་བདེན་འབྲས་ཡར་ངོའི་ཟླ་བཞིན་འཕེལ་བ་ནི་ཀུན་གྱི་མཐོང་ཆོས་སུ་གྱུར། དེའི་ཕྱི་དྲོ་ཕོ་བྲང་གསར་པའི་ནང་དུ། ༧གོང་ས་མཆོག་ནས་གསེར་གྱི་མཎྜལ་ཕུལ་ཏེ། ༧ཆོས་རྗེ་མཆོགགི་སྔོན་གནས་རྗེས་དྲན་གྱི་དག་སྣང་ཆོས་སྐོར་དཔལ་ཆེན་རྡོ་རྗེ་གཞིན་ནུའི་དཀྱིལ་འཁོར་གཉན་པོའི་སྨིན་གྲོལ་དབང་བསྐུར་གྱི་རིམ་པ་རྣམས་གསན་ནས་ཆོས་འབྲེལ་གྱི་དབུ་བཙུགས། ཕྱི་ཉིན་བོད་ཟླ་༥ཚེས་༢༥འཕྲོད་སྦྱོར་བཟང་པོ་དང་བསྟུན། རྩེ་རྣམ་རྒྱལ་གྲྭ་ཚང་གི་གཙུག་ལག་ཁང་ཆེན་མོར། ༧སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་པ་མཆོག་དང་། རྗེ་བཙུན་མ་མུ་མཚོ་སོགས་སྐུ་འཁོར་རྣམས་དད་དང་དམ་ཚིག་རྣམ་པར་དག་པས་འབྲེལ་བའི་གནས་ཆུང་གྲྭ་ཚང་འདུས་ཚོགས་དུ་མ་དང་བཅས། གཏེར་ཆེན་ལས་རབ་གླིང་པའི་ཟབ་གཏེར་ཕུར་པ་ཡང་གསང་སྤུ་གྲིའི་དཀྱིལ་འཁོར་ཆེན་པོ་ཞལ་ཕྱེས། ཚོགས་ཀྱི་མཆོད་སྤྲིན་རྒྱ་ཆེན་པོ་དང་གུ་རུའི་ཐུགས་དམ་གནད་བསྐུལ་གྱི་གསོལ་འདེབས་བྱིན་ཅན་ཟུང་དུ་སྦྲེལ་ཏེ་སྐྱེ་འགྲོ་ཀུན་ལ་ཕན་བདེ་རྒྱ་ཆེན་པོ་ལ་རྟག་ཏུ་འཚོ་ཕྱིར་ཐུགས་སྨོན་ཚད་མེད་ཀྱིས་རྒྱས་བཏབ། ཕྱི་ཚེས་༡༩ཉིན་ཕོ་བྲང་གསར་པར། ༧གོང་ས་ཆེན་པོ་དང་ཆོས་རྗེ་མཆོག་དང་རྗེ་བཙུན་མ་མུ་མཚོ་བཅས་ཉིན་གུང་གསོལ་ཚིགས་ལྷན་བཞེས་ཐོག་ཚེ་རབས་དུ་མར་རྗེ་འབངས་རེས་མོས་ཀྱི་འབྲེལ་བ་དུས་སུ་སྨིན། ཆོས་རྗེ་མཆོག་གི་དག་སྣང་ཆོས་སྐོར། འཇམ་དཔལ་ཞི་སྒྲུབ། ཁྲིད་ཡིག་སངས་རྒྱས་ལག་སྟེར། ཆོས་རྗེ་དཔལ་སྤྲུལ་གྱི་ཚིགས་གསུམ་གནད་བརྡེག་སོགས་ལས་བརྩམས་ཏེ་རྫོགས་པ་ཆེན་པོའི་གཞི་ལམ་འབྲས་གསུམ་གྱི་དཀའ་གནད་གཙོར་གྱུར་པའི་རྒྱུད་ལུང་མན་ངག་གི་གནད་གསང་དུ་མ་ཞིག་ལྷུག་སྩོལ་གྱི་གསུང་མཆིད་མཆོད་སྤྲིན་ཚུལ་དུ་ཕུལ།
༧ཆོས་རྗེ་མཆོག་ནས་སྔོན་རྗེས་ཡང་ཡང་གསོལ་བ་བཏབ་པ་བཞིན། ཕྱི་ཚེས་༢༢་བོད་ཟླ་༥་ཚེས་༣་དང་དུས་བསྟུན་༧གོང་ས་སྐྱབས་མགོན་ཆེན་པོ་མཆོག་ནས་འབྲེལ་ཡོད་ཞལ་སློབ་ཉུང་ཤས་ཤིག་ལ་དམིགས་བསལ་དུ་༧རྒྱལ་དབང་ལྔ་པ་ཆེན་པོའི་དག་སྣང་རྒྱ་ཅན་ཉེར་ལྔའི་སྙིང་པོ་ཐུགས་སྒྲུབ་ཡང་སྙིང་ཀུན་འདུས་ཀྱི་དབང་ཆེན་ཟབ་མོ་བཀའ་དྲིན་བསྐྱངས། སྤྱི་ཚེས་༢༥བོད་ཟླ་༦ཚེས་༤ལ་བདག་ཅག་གི་སྟོན་པ་མཉམ་མེད་ཐུབ་པའི་དབང་པོས་ཞིང་འདིར་ཆོས་ཀྱི་འཁོར་ལོ་བསྐོར་ཏེ་བྱིན་གྱིས་བརླབས་པའི་དུས་ཚོད་ཕུན་སུམ་ཚོགས་པའི་སྔ་དྲོའི་ཆར་ཕོ་བྲང་གསར་པའི་རྟེན་གྱི་གཙོ་བོ་སྐྱིད་གྲོང་ཇོ་བོ་ཝ་ཏི་བཟང་པོའི་སྤྱན་སྔར། ༧གོང་ས་ཆེན་པོ་དང་ཆོས་རྗེ་ཡིད་བཞིན་ནོར་བུ། རྗེ་བཙུན་མ་མུ་མཚོ། མཁན་པོ་རྣམ་གྲོལ་སོགས་དཔོན་སློབ་འདུས་པ་ལྷན་རྒྱས་ཡོངས་ནས་ཐུགས་བསྐྱེད་གདུང་བ་དྲག་པོས་བྱང་ཆུབ་མཆོག་ཏུ་སེམས་བསྐྱེད་པ་དང་། ཀུན་ཏུ་བཟང་པོའི་སྨོན་ལམ་གྱིས་མཚམས་སྦྱར་ཏེ་སྐྱེ་དགུ་རྣམས་ཀྱི་ཕན་བདེའི་རྩ་ལག་གཅིག་ཏུ་སྨིན་པའི་མཛད་བཟང་རྒྱ་ཆེན་པོ་དང་། ༧གོང་ས་མཆོག་ནས་རྗེ་བཙུན་མ་མུ་མེད་ཡེ་ཤེས་མཚོ་མོ་དེ་སྨིན་གླིང་མི་འགྱུར་དཔལ་གྱི་སྒྲོན་མའི་རྣམ་རོལ་དུ་ངོས་འཛིན་དང་ཕྱག་ཡིག་ཐམ་ཀ་བཅས་གནང་། རྗེས་སུ་༧གོང་ས་མཆོག་ནས་རྗེ་བཙུན་མ་མཆོག་ལ་ཞབས་བརྟན་སྨོན་ཚིག་བྱིན་བརྒྱའི་གཏེར་ཆེན་ཞེས་བྱ་བའང་གནང་སྟེ།
ཨོྃ་སྭ་སྟི།
ཡེ་སྟོང་གདོད་མའི་རང་རྩལ་འགག་མེད་དུ།།
ལྷུན་གྲུབ་རོལ་སྐུའི་མཛེས་པ་འབུམ་སྤྲོ་བའི།།
རྩ་གསུམ་རྒྱལ་བ་རྒྱ་མཚོའི་ཕྲིན་ལས་ཀྱིས།།
དགེ་ལེགས་བྱིན་ཆེན་ཕོབས་པའི་ཤིས་པ་སྩོལ།།
མུ༵་མེ༵ད་སྲིད་མཚོར་ལྷུང་བའི་ཉམ་ཐག་འགྲོར།།
དག་པའི་ཡེ་ཤེས་སྣང་བ་མཆོག་སྩོལ་ཞིང་།།
མཚོ༵་བྱུང་ལྷ་མོ༵་དགྱེས་པའི་སྙན་འགྱུར་སྟོང་།།
སྒྲོག་མཁས་རྗེ་བཙུན་མ་ལ་གསོལ་བ་འདེབས།།
སྐུ་ཚེ་མི་འགྱུར་རྡོ་རྗེའི་གཤིས་སུ་བརྟན།།
འཕྲིན་ལས་མཛད་པ་ཕྱོགས་ཀྱི་འཁོར་ལོ་ཁྱབ།།
ཉེ་འབྲེལ་མཆོད་ཡོན་དམ་ཚིག་གཙང་མ་ཡིས།།
བསྟན་འགྲོའི་ཕན་བདེ་རིང་དུ་སྐྱོང་གྱུར་ཅིག།
སྐྱབས་གནས་རྒྱལ་བའི་ཐུགས་བསྐྱེད་ཟབ་མོ་དང་།།
མཐུ་ལྡན་བསྟན་སྲུང་རྒྱ་མཚོའི་ནུས་མཐུའི་སྟོབས།།
གཡོ་མེད་ལྷག་བསམ་བདེན་པའི་རེ་སྨོན་ལས།།
འདོད་དོན་འགྲུབ་པའི་དགེ་མཚན་འབར་གྱུར་ཅིག།
ཅེས་པའང་རྗེ་བཙུན་མ་མི་འགྱུར་དཔལ་སྒྲོན་གྱི་ཡང་སྤྲུལ། མུ་མེད་ཡེ་ཤེས་མཚོ་མོར་བརྟན་བཞུགས་སྨོན་ཚིག་འདི་འདྲ་ཞིག་དགོས་ཞེས་༧རྒྱལ་དབང་པདྨའི་གདུང་འཚོབ་མཁན་རིན་པོ་ཆེ་འཇིགས་མེད་ཕུན་ཚོགས་ཀྱི་ཞལ་སྔ་ནས་དང་། དད་དམ་དགེ་བའི་སེར་སྐྱ་དུ་མ་ཞིག་ནས་བསྐུལ་ངོར། ཤཱཀྱའི་དགེ་སྦྱོང་བསྟན་འཛིན་རྒྱ་མཚོས་རབ་བྱུང་བཅུ་བདུན་པའི་ཟླ་༧ཚེས་༡༦ སྤྱི་ལོ་༢༠༠༠ ཟླ་༩ ཚེས་༡༤ ཉིན་དྷ་རཾ་ས་ལ་ཐེག་ཆེན་ཆོས་གླིང་དུ་བྲིས་པ་དགེ་ལེགས་འཕེལ་ཅེས་སོ། །
སྤྱི་ལོ་༡༩༩༠ཟླ་༧ཚེས་༣༡བོད་ཟླ་༦ཚེས་༩ཉིན་རྣམ་གྲོལ་གླིང་དགོན་གྱི་མཁན་སྤྲུལ་དབུ་ལས་རྣམས་དང་། གཞིས་འགོ་ལས་སྣེ་བཅས་ཕེབས་བསུ་བཅར་བ་བཞིན་རྣམ་གླིང་གཙུག་ལག་ཁང་དུ། ༧ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་རྣམ་གཉིས་མི་འཇིགས་གདོང་ལྔས་བཏེགས་པའི་གསེར་ཁྲི་རིན་པོ་ཆེར་ཞབས་སོར་འཁོད། ༧སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ་མཆོག་དང་སེ་ར་བྱེས་སྨད་ཀྱི་མཁན་རྣམ་གཉིས། གཞིས་འགོ སྐུ་ངོ་མཆོག་དང་། ཆོས་སྡེ་ཁག་སོ་སོ་ནས་མཎྜལ་རྟེན་གསུམ་འདེགས་འབུལ་དང་འབྲེལ་སེར་སྐྱ་མི་དམངས་ཡོངས་ལ་མཇལ་ཁ་གནང་། སྤྱི་ལོ་༡༩༩༠ཟླ་༡༠ཚེས་༢༢་སྔ་དྲོར་སྐྱབས་རྗེ་གྲུབ་དབང་རིན་པོ་ཆེ་དབུ་བཞུགས་ཀྱིས་འདུས་སྡེ་ཡོངས་ནས་ཚེ་སྒྲུབ་གསང་བ་འདུས་པའི་དཀྱིལ་འཁོར་དང་། འབྲེལ་བརྟན་བཞུགས་རྒྱས་པ་ཞིག་དང་དེ་དང་ལྷན་དུ་རྗེ་བཙུན་མ་མུ་མེད་ཡེ་ཤེས་མཚོ་མོ་གསེར་ཁྲིར་མངའ་གསོལ་དང་། པད་ཞྭ་མཐོང་གྲོལ་ཆེན་མོ་སོགས་རྟེན་གསུམ་གྱི་མཎྜལ་གྱ་ནོམ་པ་དང་། བཀའ་དྲིན་གཏང་རག་གི་ཡོན་དུ་འབུལ་ཚོན་གྱི་རིམ་པ་རྣམས་ཚར་དུ་མངར་བ་བསྟར་ཏེ་གུས་པས་ཕུལ།
སྤྱི་ལོ་༡༩༩༠ཟླ་༡༠ཚེས་༢༣ཉིན་སླར་ཡང་རྣམ་གླིང་ཆིབས་ཞལ་བཏེགས། རིམ་བཞིན་ལྷོ་ཕྱོགས་དཔལ་རི། དཔལ་ལྡན་འབྲས་སྤུངས་མཆོད་རྟེན་ཆེན་མོ། གནས་མཆོག་རྡོ་རྗེ་གདན། བྱ་རྒོད་ཕུང་པོ་རི། ཝཱ་ར་ཎ་སི། མཉན་ཡོད། རྩྭ་མཆོག་གྲོང་། ལུམྦི་ནི་རྣམས་དང་། བལ་ཡུལ་མཆོད་རྟེན་རྣམ་གསུམ་སོགས་གནས་མཆོག་རྣམས་སུ་ཐུགས་སྨོན་མཆོད་འབུལ་ལེགས་པར་གྲུབ་མཚམས། སྤྱི་ལོ་༡༩༩༠ཟླ་༡༡ཚེས་༡༨ཉིན་ཧོང་ཀང་བརྒྱུད་བླ་རུང་ལྔ་རིག་ནང་བསྟན་སློབ་གླིང་དུ་བདེ་བར་ཞབས་སོར་བཀོད།
སྤྱི་ལོ་༡༩༩༣ལ་སྐྱབས་རྗེ་རྡོ་གྲུབ་རིན་པོ་ཆེའི་ལུང་དོན་བཞིན་འགྲོ་ཀུན་བདེ་ཆེན་ཞིང་དུ་འདྲེན་པའི་ཕྲིན་ལས་ཐོག་མར་གསེར་ཐང་བླ་རུང་མདོ་ལོ་པཎ་བསུ་སྐྱེལ་ཐང་ཆེན་དུ་བདེ་ཆེན་ཞིང་སྒྲུབ་ཉིན་བཅོ་ལྔའི་རིང་ལ། ཆོས་རྗེ་མཆོག་དང་མཉམ་དུ་དད་ལྡན་བླ་སྤྲུལ་སེར་སྐྱ་མང་ཚོགས་རགས་རྩིས་བྱས་ན་འབུམ་བཞི་ལྷག་ལ་རྗེ་བཙུན་མ་མུ་མཚོ་མཆོག་ནས་རྒྱལ་སྲས་ལག་ལེན་འགྲེལ་བ་རྒྱས་པ་དང་། མགོན་པོ་འོད་དཔག་མེད་ཀྱི་བཀའ་དབང་། འཕགས་པ་ཐུགས་རྗེ་ཆེན་པོའི་བཀའ་དབང་བཅས་བཀའ་དྲིན་དུ་བསྩལ་བ་དང་། དགེ་བ་བཅུའི་ཁྲིམས་སྲོལ་བསྡམས། རྔོན་རྐུ་སོགས་སྤྱོད་ངན་ཐམས་ཅད་རྒྱུན་གཅོད་ཐབས་ལ་ཐུགས་བརྩོན་ཆེན་པོ་གནང་། མགོན་པོ་འོད་དཔག་མེད་ཀྱི་མཚན་སོགས་ཁས་ལེན་དུ་མ་དང་། མཁའ་ཁྱབ་སེམས་ཅན་རྣམས་ཞིང་མཆོག་བདེ་བ་ཅན་དུ་འདྲེན་པའི་འཕྲིན་ལས་ཀྱི་ཉིན་བྱེད་ཐོག་མར་དྲངས།
སྤྱི་ལོ་༡༩༩༣ཟླ་༧ཚེས་ཨ་མེ་རི་ཀ་ནས་ཟུར་མང་དྲུང་པ་སྲས་རིན་པོ་ཆེ་དང་ལྕགས་མདུན་རིན་པོ་ཡབ་སྲས། རྒྱལ་སྤྲུལ་རིན་པོ་ཆེ་སོགས་ཆོས་ཚོགས་དུ་མ་ནས་གསོལ་བ་བཏབ་པ་བཞིན། ཞང་པོ་ཆོས་རྗེ་ཡིད་བཞིན་ནོར་བུ་དང་མཉམ་དུ་རྗེ་བཙུན་མ་ཉིད་ཨ་རིར་ཕེབས་ནས། ཟུར་མང་དྲུང་རིན་པོ་ཆེའི་ཆོས་ཚོགས་དང་། ཨ་ཏིའི་གླིང་། རིག་འཛིན་གླིང་། ཡེ་ཤེས་སྙིང་པོའི་གླིང་། བྱང་ཆུབ་ཆོས་གླིང་། གངས་ལྷའི་ལྷ་ཁང་སོགས་སུ་འཁོད་པའི་ཕྱི་རྒྱལ་སློབ་ཚོགས་རྣམས་ལ། སྨིན་གྲོལ་ཟབ་རྒྱས་ཀྱི་ཆོས་མཛོད་ཐང་མར་བརྡལ་ཏེ་རེ་བ་ཡོངས་སུ་ཚིམས་པར་བྱས། ཚེས་༢༣ལ་ཧྥ་རན་སི་རྒྱལ་ཁབ་ཏུ་བསོད་རྒྱལ་རིན་པོ་ཆེའི་གདན་ཞུ་ལྟར་རིག་པ་ཆོས་ཚོགས་སུ་ཕེབས་བསུ་རྒྱ་ཆེན་པོ་མཛད། ཚེས་༢༤ལ་བསོད་རྒྱལ་རིན་པོ་ཆེ་དབུར་བཞུགས་པའི་ཧྥ་རན་སི་སློབ་ཚོགས་རྣམས་ལ་ཆོས་རྗེ་མཆོག་ནས་ལས་རབ་གླིང་པའི་ཕུར་བ་ཡང་གསང་སྙིང་པོའི་བསྡུས་པའི་ལུགས་ཀྱི་དབང་དང་། རྫོགས་པ་ཆེན་པོའི་ཀ་དག་ཁྲེགས་ཆོད་དང་ལྷུན་གྲུབ་ཐོད་བརྒལ་གྱི་སྒོ་ནས་གདམས་ཁྲིད་གནང་། རྗེ་བཙུན་མ་མུ་མཚོ་ནས་ཀྱང་ལས་རབ་གླིང་པའི་གཏེར་ཁ་ལས་བྱུང་བའི་གྲོ་ལོད་བདེ་གཤེགས་འདུས་པའི་དབང་བཀའ་གནང་། ཆོས་རྗེ་ཡིད་བཞིན་ནོར་བུ་དང་། རྗེ་བཙུན་མ་མུ་མཚོ། རྫོགས་ཆེན་རིན་པོ་ཆེ། པདྨ་སྐལ་བཟང་རིན་པོ་ཆེ་སོགས་ཧྥ་རན་སིའི་མཐོ་སྒང་དུ་ཕེབས་ནས་རང་ཡུལ་གྱི་ཡུལ་ལྷ་གཞི་བདག་རྣམས་ལ་བསང་མཆོད་ཕུལ།
སྤྱི་ལོ་༡༩༩༤ཟླ་བ་༣ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་རྣམ་གཉིས་གཙོས་དཔོན་སློབ་བཅུ་ཙམ་རྫ་སྟོད་ལྕང་མ་རི་ཁྲོད་ཀྱི་བླ་སེར་རྣམས་ཀྱིས་ལན་མང་གསོལ་བ་བཏབ་ནས་གདན་ཞུས་བཞིན། བྲག་འགོ དཀར་མཛེས་རྫོང་གི་དགོན་པ་ཁ་ཤས་ཀྱི་གདན་ཞུས་བཞིན་དེར་བྱོན་ནས་ཆོས་འབྲེལ་གནང་། ཡིད་ལྷུང་ལྷ་མཚོ་ལ་ཕེབས་ནས་དེར་སྐུ་སྐྱེ་གོང་མ་ཉག་བླ་བསོད་རྒྱལ་གྱི་གཏེར་མཚོ་ཡིན་པས་ཡ་མཚན་པའི་གཟིགས་སྣང་དུ་མ་དངོས་སུ་མཇལ། དེ་ནས་རྫོགས་ཆེན་ཤྲཱི་སེང་ཧཱ་དང་རྫོགས་ཆེན་དགོན་གཉིས་ཀྱིས་གདན་ཞུས་བཞིན་དེར་ཕེབས། དེ་ནས་ཞེ་ཆེན་དགོན་པ་དང་། འགོ་ཚ་དགོན་པ། རྫ་ཆུ་ཁ་ཁྲོ་ཤུལ་གོང་འོག་གཉིས་དང་། དགེ་མང་དགོན་སོགས་སུ་ཕེབས་ནས་དེ་རྣམས་ཀྱི་རེ་འདོད་ལྟར་ཆོས་འབྲེལ་དང་། བཀའ་དབང་ཅི་རིགས་གནང་། དེ་ནས་ཐུབ་དགའ་ཡིད་བཞིན་ནོར་བུའི་གདན་ས་ལྕང་མ་རི་ཁྲོད་དུ་ཕེབས། དེ་ནས་དཔལ་སྤྲུལ་གྱི་གནད་ས་དགེ་གོང་དགོན་དང་། སེར་ཤུལ་དགོན་པས་གདན་ཞུས་བཞིན་དེར་ཕེབས་ནས་བཀའ་ཆོས་ཟབ་རྒྱས་གནང་། དེ་ནས་མཚོ་སྔོན་ཞིང་ཆེན་ཡུས་ཧྲུའུ་ཁུལ་དུ་སློབ་མ་རྣམས་ཀྱིས་གདན་ཞུས་བཞིན་དེར་བཀའ་བརྒྱུད་པའི་དགོན་པ་བཅུ་ཙམ་ལ་ཕེབས་ནས་བཀའ་དབང་དང་ཆོས་འབྲེལ་རྒྱ་ཆེར་གནང་། དེ་ནས་རྨ་ཆེན་རྫོང་ཧོར་སྐོར་ལ་ཆིབས་བསྒྱུར་གནང་། དད་ལྡན་སེར་སྐྱ་རྣམས་ལ་ཆོས་འབྲེལ་ཚིམས་པར་གནང་། དེ་ནས་ཤར་རྨ་རྒྱལ་སྤོམ་རའི་མདུན་ལ་བྱོན། ལྷ་བསང་རི་ཁྲུས་ལེགས་པར་གནང་། ཨ་མྱེ་རྨ་ཆེན་གྱིས་དགྱེས་ཚོར་ཆེན་པོའི་རྟགས་སུ། རིན་ཆེན་དང་པོའི་རྒྱན་ཆ་སྤོས་ལེགས་དངོས་སུ་གནང་བར་གྲགས། སེང་འབྲུག་སྟག་རྩེ་ལ་ཕེབས་ནས། འཛམ་གླིང་སེང་ཆེན་དགྲ་འདུལ་རྗེ་བློན་རྣམས་ཀྱི་འདྲ་སྐུ་ལ་རབ་གནས་ཀྱི་མེ་ཏོག་འཐོར་སྐབས། བཀའ་བློན་འདན་མའི་སྐུ་འདྲའི་ཕྱག་གི་རུ་དར་གཡོ་བ་སོགས་རྟགས་མཚན་བཟང་པོ་བྱུང་ངོ་།།
དེ་ནས་གཅིག་སྒྲིལ་རྫོང་གི་སྨིན་ཐང་དགོན་དུ་ཕེབས། གཉན་པོ་གཡུ་རྩེའི་མདུན་ལྷ་བསང་ཕུལ་ནས། ཆོས་རྗེ་ཡིད་བཞིན་ནོར་བུས་ཕྱུག་མཚོ་ལ་བུམ་གཏེར་སྦ་བ་དང་། མཚོ་དེ་ཡི་དཀྱིལ་དུ་ཕེབས་ནས་གཏེར་གྱི་སྒྲོམ་བུ་བཞེས། དེ་ནས་སྟག་རྩེ་དགོན་ལ་ཕེབས། དེ་ནས་རྔ་བ་རྫོང་གནམ་མཚོ་དགོན་དང་རྔ་བ་ཀིརྟིའི་དགོན་ལ་ཕེབས། དད་ལྡན་སེར་སྐྱ་རྣམས་ལ་ཕྱག་དབང་བཀའ་ཆོས་གནང་། དེ་ནས་ཟང་ཆུ་རྫོང་གི་ཤར་དུང་རིའི་མ་ཎི་རང་བྱུང་གི་རི་ཁྲོད་དུ་ཕེབས་ལམ་དུ་ཁྱུང་མཆུ་རྫོང་གིས་ཕེབས་བསུ་རྒྱ་ཆེན་བྱས་ཏེ་རྨེ་བ་རུང་ཐ་དགོན་པར་ཞབས་སོར་བཀོད། རྨེ་བ། སྦྲ་ཆེན། ཨ་མོས་ཁོག་ཏུ་སེར་སྐྱ་དད་ལྡན་ཁྲི་ཚོགས་མང་པོ་མཇལ་ཁ་དང་ཆོས་འབྲེལ་གནང་། དེ་ནས་ཁྲིན་ཏུར་ཀྲའོ་ཇའོ་དགོན་པར་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་གཙུག་ཁང་གི་སྒོ་འབྱེད་ཀྱི་མཛད་སྒོ་ལ་གདན་ཞུས་བཞིན་ཁྲིན་ཏུར་ཕེབས། དེར་སྒོ་འབྱེད་ལེགས་པར་གྲུབ་ནས་བཞུགས་སྒར་གསང་ཆེན་འོད་སྐུར་གྲོལ་བའི་དབེན་ཁྲོད་དུ་བདེ་བར་ཞབས་སོར་བཀོད།
སྤྱི་ལོ་༡༩༩༤ལོ་སྟོན་ཁ། རྟའུ་རྫོང་ར་སྒང་དགོན་པའི་གཙོས་དགོན་ཁག་མང་པོ་དང་། མི་དམངས་རྣམས་ནས་ལན་གྲངས་གསོལ་བ་བཏབ་པ་བཞིན། ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་གཙོས་སྐུ་འཁོར་རྣམས་ལ་ཕེབས་བསུ་རྒྱ་ཆེན་དང་བཅས་ར་སྒང་དགོན་པར་ཞབས་སོར་འཁོད། བདེ་ཆེན་ཞིང་སྒྲུབ་ཆེན་མོ་ཐེངས་གཉིས་པ་ཞག་བཅུའི་བར་དུ་འཚོགས། མཁན་སྤྲུལ་བླ་སེར་ཁྲི་གཅིག་ལྷག་དང་། མང་ཚོགས་ཁྲི་ཕྲག་དུ་མར་རྗེ་བཙུན་མ་མུ་མཚོ་མཆོག་ནས་སྤྱན་རས་གཟིགས་ཀྱི་བཀའ་དབང་དང་། འོད་དཔག་མེད་ཀྱི་བཀའ་དབང་། རྒྱལ་སྲས་ལག་ལེན། ཆོས་བཞི་རིན་པོ་ཆེའི་ཕྲེང་བ། ལམ་གཙོ་རྣམ་གསུམ་ལྗགས་ཁྲིད་གནང་། དགེ་བཅུའི་ཁྲིམས་དང་། རི་རྒྱ་རྔོན་ཁྲིམས། རྐུ་རྒྱ་ཇག་ཁྲིམས་དང་། འོད་དཔལ་མེད་ཀྱི་མཚན་འབུམ་ཐེར་ཁས་ལེན་སོགས་འགྲོ་ཀུན་བདེ་ཆེན་ཞིང་དུ་འདྲེན་པའི་འཕྲིན་ལས་ཀྱི་སྒོ་འཕར་ཕྱེས་སོ།།
སྤྱི་ལོ་༡༩༩༥ལོར། གསེར་སྟོད་རྟ་ཤུལ་དང་རྐང་རྩ་ཚོ་པ་གཉིས་ཀྱིས་གདན་ཞུས་བཞིན། ༧ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་སྐུ་འཁོར་རྣམས་དེར་ཕེབས་ནས་ཉིན་བཞིའི་རིང་ལ་བཟང་སྤྱོད་སྨོན་ལམ་དང་འབྲེལ་བའི་བདེ་ཆེན་ཞིང་སྒྲུབ་འཚོགས། མི་གྲངས་ཁྲི་གསུམ་ཙམ་ལ་རྗེ་བཙུན་མ་མུ་མཚོ་མཆོག་ནས། སྙིང་གཏམ་སྙིང་གི་ཐིག་ལེ་དང་། ཐར་པའི་ས་བོན་འདེབས་པའི་བཀའ་དབང་བསྐུར་ནས་འགྲོ་ཀུན་བདེ་ཆེན་ཞིང་དུ་འདྲེན་པའོ།།
༡༩༩༩སྤྱི་ཟླ་༢པ་ལ། བྲག་འགོ་རྫོང་བླ་མ་གནས་ནང་བླ་བྲང་ནས་གསོལ་བ་བཏབ་པ་བཞིན་༧ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་གཙོས་སྐུ་འཁོར་རྣམས་དེར་ཕེབས་ནས་བདེ་ཆེན་ཞིང་སྒྲུབ་ཉིན་བཞི་འཚོགས། རྗེ་བཙུན་མ་མཆོག་ནས་འོད་དཔག་མེད་ཀྱི་བཀའ་དབང་དང་། རྒྱལ་སྲས་ལག་ལེན་གྱི་ལྗགས་བཤད་གནང་། དད་ལྡན་སེར་སྐྱ་མི་གྲངས་ཁྲི་ལྔ་ཙམ་འབྲེལ་ཚད་དོན་ལྡན་མཛད། དེ་ནས་བྲག་འགོ་འབུམ་ཉ་དགོན་པའི་གདན་ཞུ་བཞིན། ༧ཆོས་རྗེ་ཞང་ཚན་སྐུ་འཁོར་རྣམས་དེར་ཕེབས་ནས་ཉིན་ལྔའི་རིང་ལ་བདེ་ཆེན་ཞིང་སྒྲུབ་ཆེན་མོ་འཚོགས་ནས་སེར་སྐྱ་མི་གྲངས་ཁྲི་བཅུ་ལས་བརྒལ་བར། རྗེ་བཙུན་མ་མཆོག་གིས་ཆོས་བཞིན་རིན་པོ་ཆེའི་ཕྲེང་བ་དང་། ལམ་གཙོ་རྣམ་གསུམ་གྱི་བཀའ་ཆོས་དང་། སྤྱན་རས་གཟིགས་ཀྱི་བཀའ་དབང་གནང་།
སྤྱི་ལོ་༡༩༩༥ལོ་ཟླ༣པར། ཉག་རོང་རྫོང་གི་དགོན་ཁག་ཞེ་བདུན་སྡེ་ཤོག་ཉེར་བཞི་ནས་སྔར་རྗེས་ལན་མང་གསོལ་བ་བཏབ་པ་བཞིན། ༧ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་རིན་པོ་ཆེ་གཙོས་སྐུ་འཁོར་རྣམས་ལ་རིང་ཐུང་གི་ཕེབས་བསུ་རྒྱ་ཆེན་པོ་བྱས་ནས་གནས་དེར་ཞབས་སོར་འཁོད། དད་ལྡན་སེར་སྐྱ་མང་ཚོགས་འབུམ་ཐེར་དྲུག་ལ་བདེ་ཆེན་ཞིང་སྒྲུབ་ཆེན་པོ་ཉིན་བརྒྱད་རིང་ལ་འཚོགས་སྐབས། ༧ཆོས་རྗེ་ཡིད་བཞིན་ནོར་བུས་སྔ་དྲོ་ལ་བཀའ་ཆོས་གནང་། རྗེ་བཙུན་མ་མུ་མཚོས་ཕྱི་དྲོར་ཆོས་ཁྲིད་གནང་ནས་ཉིན་རེ་བཞིན། རྒྱལ་སྲས་ལག་ལེན། ལམ་གཙོ་རྣམ་གསུམ། ཆོས་བཞི་རིན་པོ་ཆེའི་ཕྲེང་བ། སྙིང་གཏམ་སྙིང་གི་ཐེག་ལེ། སྤྱན་རས་གཟིགས་ཀྱི་དབང་། འོད་དཔག་མེད་ཀྱི་བཀའ་དབང་བཅས་བསྩལ། འོད་ཕུང་དགོན་པའི་རྗེ་བཙུན་མ་མུ་མཚོ་ལ་གསེར་ཁྲི་མངའ་གསོལ་བ་དང་། མཎྜལ་རྟེན་གསུམ་མཆོད་སྤྲིན་དུ་ཕུལ། དད་ལྡན་སེར་སྐྱ་རྣམས་དགེ་བཅུའི་ཁྲིམས་ལ་བཀོད་དེ་རྔོན་རྐུ་སོགས་སྤྱོད་ངན་རྣམས་རྒྱུན་བཅད་ནས། འགྲོ་ཀུན་བདེ་ཆེན་ཞིང་དུ་ལམ་སྣ་ཟིན་པར་བྱས། ཤིན་ཏུ་ངོ་མཚར་བའི་གནས་ནི། རིང་བསྲེལ་དཀར་སེར་དམར་ལྗང་གི་ཆར་འབེབས་པ་དང་། དམ་རྫས་མྱོང་གྲོལ་རིལ་བུའི་ཆར་བབས་ནས། ས་ལ་གནས་པའི་སེམས་དཔའ་རྣམས་ཀྱིས་སྤྱོད་ཡུལ་ཇི་ལྟ་བ་བཞིན། སྐྱེ་འགྲོ་ལྟོས་བཅས་རྣམས་ཤིན་ཏུ་དད་པའི་གནས་ལ་བཀོད་པར་མཛད་དོ།།
བོད་རབ་རྒྱན་སྟོག་ལོར་ཆོས་རྗེ་ཡིད་བཞིན་ནོར་བུ་དང་། རྗེ་བཙུན་མ་མུ་མཚོ་གཉིས་ལ་གསོལ་བ་ཡང་ཡང་བཏབ་པ་བཞིན་ཆིབས་ཁ་མི་ཉག་ཕྱོགས་སུ་བསྒྱུར་ཏེ་དགོན་གནས་དུ་མ་དང་ལམ་བར་དུ་ར་ལི་སྟོད་པ་སྨོན་འདུན་དགོན་དུ་བྱོན་ནས་བདེ་ཆེན་ཞིང་སྒྲུབ་ཉིན་གསུམ་བར་འཚོགས་ཏེ་དད་ལྡན་མང་ཚོགས་ལ་བཀའ་དབང་དུ་མ་ཐུགས་བརྩེ་བ་ཆེན་པོས་གནང་སྟེ་ཡུལ་དགོན་ཀུན་ལ་ཕན་བདེ་བླ་ལྷག་ཏུ་སྤེལ་བར་མཛད་དོ།།
༡༩༩༥ལོའི་ཟླ་༥ཚེས་༡ལ་སེང་གྷ་ཕོར་སློབ་ཚོགས་ཡོངས་ནས་སྐྱབས་རྗེ་སྐུ་འཁོར་རྣམས་ལ་གདན་ཞུས་བཞིན་དེར་ཕེབས་ནས་སྐད་གྲགས་ཆེ་བ་ཧུང་ཧྥུའུ་འདུན་ཁང་ཆེན་མོར་སྐྱབས་རྗེ་མཆོག་ནས་དགེ་བསྙེན་གྱི་སྡོམ་པ་གནང་རྗེས་ཕུར་པ་མགུལ་ཁུག་མའི་བཀའ་དབང་གནང་། ཚེས་གསུམ་ཉིན། ད་ཀྲོང་ཆོས་ཚོགས་ལ་ཕུར་པ་མགུལ་ཁུག་དབང་དང་། རྗེ་བཙུན་མ་མུ་མཚོས་འཇམ་དཔལ་ཞི་སྒྲུབ་ཀྱི་བཀའ་དབང་གནང་། ཚེས་༡༤ཉིན་སྟོན་པའི་འཁྲུངས་སྐར་དུས་ཆེན་གྱི་མཛད་སྒོ་ལ་གཟིགས་མོར་ཕེབས། ཚེས་༡༦ལ། དཔལ་ཡུལ་བྱང་ཆུབ་ཆོས་ཚོགས་ཀྱི་སློབ་མ་རྣམས་ལ་འཇམ་དཔལ་ཞི་སྒྲུབ་ཀྱི་བཀའ་དབང་གནང་།
༡༩༩༥་ཟླ་༥ཚེས་༢༡མ་ལེ་ཤིས་ཡའི་སློབ་མ་རྣམས་ཀྱིས་གདན་ཞུས་བཞིན་དེར་ཕེབས། འཇམ་དཔལ་ཞི་སྒྲུབ་ཀྱི་བཀའ་དབང་གནང་། ཚེས་༢༡ ཕྱི་དྲོ་ལ་རྗེ་བཙུན་མ་མུ་མཚོ་ནས་ཕུར་པ་མགུལ་ཁུག་མའི་བཀའ་དབང་གནང་། ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་མུ་མཚོ་རྣམས་རང་ཡུལ་དུ་འབྱོན་རན་པའི་སྐབས་སུ། མ་ལེ་ཤིས་ཡིས་སློབ་མ་རྣམས་ཀྱིས་འབྲལ་མི་ཕོད་པའི་དད་འདུན་གྱིས་མིག་མཆི་མ་འཁྲིགས་ལུས་བ་སྤུ་གཡོ་བ་སོགས། ཚེ་རབས་གཏན་དུ་མི་འབྲལ་བའི་སྨོན་ལམ་ཡང་ཡང་བཏབ་པར་མཛད་དོ། །
༡༩༩༥ལོར། ཆོས་རྗེ་ཡིད་བཞིན་ནོར་བུས་ཞལ་བཀོད་བཞིན། དཔལ་སྒྱུ་འཕྲུལ་དྲྭ་བའི་བློས་སློང་འཛམ་གླིང་ན་ཁྱད་དུ་འཕགས་པ་ཞིག་ཐུགས་བསྐྱེད་བསོད་ནམས་ཀྱི་མཐུ་ལས་ཇི་ལྟར་གྲུབ་པའི་ཚུལ་ནི། ཕྱི་ནང་གི་ལྷ་རྟེན་རྣམས་ཀྱི་འགྲོ་གྲོན་ཐམས་ཅད་རྗེ་བཙུན་མ་མུ་མཚོ་རིན་པོ་ཆེ་ནས་གནང་། གཞལ་ཡས་ཁང་། སྒོ་བཞི། རྟ་བབས་བརྒྱད་པ། རྒྱལ་མཚན་བརྒྱད། འཕན་བརྒྱད། དྲྭ་བ་དྲྭ་ཕྱེད་རྡོ་རྗེའི་ཏོག་ཅན་དང་། ཕྱི་རོལ་དུ་དུར་ཁྲོད་ཆེན་པོ་བརྒྱད། པདྨ་སོ་གཉིས། རྡོ་རྗེའི་གྱེན་འགྲེང་། མེ་རུ། ལྷ་བརྒྱད། ཀླུ་བརྒྱད། མཆོད་པའི་ལྷ་མོ་བཅུ་དྲུག་སོགས་ལ་ཁྱོན་སྒོར། འབུམ་ཐེར་བཞི་བཅུ་ལྷག་ཙམ་དང་། ནང་གི་ལྷ་ཞི་བ་བཞི་བཅུ་རྩ་གཉིས་ཟངས་གསེར་གྱིས་བྱས་པ་ལ་སྒོར། ཆིག་འབུམ་བཞི་སྟོང་བཞི་བརྒྱ་ལྷག་གི་འགྲོ་གྲོན་བཏང་ཡོད། ཁྱོན་སྒོར་ས་ཡ་ལྔ་བཞི་སྟོང་བཞི་བརྒྱ་ལྷག་གིས་སྐྱེ་དགུ་རྣམས་ཀྱིས་བསོད་ནམས་བསགས་པའི་རྟེན་ཁྱད་པར་ཅན་དུ་བསྐྲུན་པའོ། །
སྤྱི་ལོ་༡༩༩༨ལོར་སྒྱུ་འཕྲུལ་བློས་བསླངས་ཀྱི་འོག་ཏུ་སླར་ཡང་ལྷ་ཁང་ཉེར་གསུམ་བསྐྲུན་ཏེ། སྒྲུབ་བརྒྱུད་ཤིང་རྟ་བརྒྱད་ཀྱི་ལྷ་ཁང་གཙོས། རྒྱ་ནག་གི་ལྷ་ཁང་། གཡུང་དྲུང་བོན་གྱི་ལྷ་ཁང་བཅས་༼བཞུགས་བྱང་ནི། ཤར་ཏུ་གཡོན་རིགས་གསུམ་མགོན་པོའི་ལྷ་ཁང་། དབུས་སུ་རྒྱུ་མཚན་ཉིད་ཐེག་པའི་ལྷ་ཁང་། གཡས་སུ་རྫོགས་པ་ཆེན་པོའི་ལྷ་ཁང་། ཤར་ལྷོ་རུ། གཡོན་དཔལ་ལྡན་ས་སྐྱའི་ལྷ་ཁང་། དབུས་སུ་སྔ་འགྱུར་རྙིང་མའི་ལྷ་ཁང་། གཡས་སུ་ཆོས་རྗེ་བཀའ་གདམས་པའི་ལྷ་ཁང་། ལྷོ་རུ། གཡོན་གནོད་སྦྱིན་ནོར་ལྷའི་ལྷ་ཁང་། དབུས་སུ་གསང་བདེ་འཇིགས་གསུམ་གྱི་ལྷ་ཁང་། གཡས་སུ་ཚེ་ལྷ་རྣམ་གསུམ་གྱི་ལྷ་ཁང་། ལྷོ་ནུབ་ཏུ། གཡོན་དུ་གཡུང་དྲུང་བོན་གྱི་ལྷ་ཁང་། དབུས་སུ་རྒྱ་ནག་ཧཱ་ཤང་གི་ལྷ་ཁང་། གཡས་སུ་རྗེ་བཙུན་ཇོ་ནང་པའི་ལྷང་ཁང་། ནུབ་ཏུ། གཡོན་དུ་དུས་ཀྱི་འཁོར་ལོའི་ལྷ་ཁང་། དབུས་སུ་པདྨ་དབང་གི་ལྷ་ཁང་། གཡས་སུ་བཀའ་དགོངས་ཕུར་གསུམ་གྱི་ལྷ་ཁང་། ནུབ་བྱང་དུ། གཡོན་དུ་ཁྱུང་པོ་བཀའ་བརྒྱུད་པའི་ལྷ་ཁང་། དབུས་སུ་འགྲོ་མགོན་བཀའ་བརྒྱུད་པའི་ལྷ་ཁང་། གཡས་སུ་རི་བོ་དགེ་ལྡན་པའི་ལྷ་ཁང་། བྱང་དུ། གཡོན་དུ་གསུང་རབ་གླེགས་བམ་གྱི་ལྷ་ཁང་། དབུས་སུ་རྗེ་བཙུན་སྒྲོལ་མའི་ལྷ་ཁང་། གཡས་སུ་སྒོ་ཁང་། བྱང་ཤར་དུ། གཡོན་དུ་ཉན་ཐོས་དགྲ་བཅོམ་པའི་ལྷ་ཁང་། དབུས་སུ་ཆོས་སྐྱོང་སྲུང་མའི་ལྷ་ཁང་། གཡས་སུ་ཞི་བྱེད་གཅོད་ཀྱི་ལྷ་ཁང་བཅས་ཁྱོན་ལྷ་ཁང་ཉེར་གསུམ༽ བསྐྲུན་ནས་ཕྱག་དང་མཆོད་པ་བསྐོར་བ་སོགས་མཐོང་ཐོས་དྲན་རེག་ཐམས་ཅད་གནས་སྐབས་ནད་གདོན་བར་ཆད་ཞི་བ་དང་། མཐར་ཐུག་བླ་ན་མེད་པའི་སངས་རྒྱས་ཀྱི་གོ་འཕང་ལ་འགོད་ཕྱིར་དུ། ཁམས་གསུམ་ཆོས་ཀྱི་རྒྱལ་པོ་ཆོས་རྗེ་ཡིད་བཞིན་ནོར་བུ་དང་། རྒྱལ་ཚབ་རྗེ་བཙུན་མ་མུ་མེད་ཡེ་ཤེས་མཚོ་མོ་རྣམ་གཉིས་ཀྱི་ཐུགས་བསྐྱེད་བླ་ན་མེད་པའི་ཤིང་རྟ་ལས་གྲུབ་པ་ཡིན་ནོ། །
སྤྱི་ལོ་༡༩༩༨ལོ། སྔ་འགྱུར་བསྟན་པའི་མངའ་བདག་སྨིན་གླིང་གདུང་སྲས་རིན་པོ་ཆེ་དང་ཆོས་མཛད་འཇམ་དཔལ་ལགས་སོགས་ཨོ་རྒྱན་སྨིན་གྲོལ་གླིང་གི་དགེ་འདུན་པ་ལྷན་རྒྱས་ནས་ཐུགས་འདུན་བཞིན། རྗེ་བཙུན་མའི་མདུན་དུ་སྔར་ནས་ཆོས་ཀྱི་འབྲེལ་བ་ཐོབ་པའི་གོ་འཇོ་བྲག་ནག་དགོན་གསང་སྔགས་ཆོས་གླིང་གི་བླ་སྤྲུལ་རྣམས་དང་། མཁོ་ཁྱིམ་དགོན་པའི་སྤྲུལ་སྐུ་སྒྲོན་སྐྱབས་སོགས་ཀྱིས་ཀྱང་སྔ་ཕྱི་བར་གསུམ་དུ་སྐུ་སྐྱེ་གོང་མའི་ཁྲི་ལ་འཁོད་དགོས་པར་གསོལ་བ་ཡང་ཡང་བཏབ་པ་ལ་བརྟེན་ནས། ཆུ་ཕོ་སྟག་གི་ལོའི་སྟོན་ཟླ་ར་བའི་དུས་སུ། གདན་ས་གསེར་ལྗོངས་བླ་མ་རུང་གསང་ཆེན་འོད་སྐུར་གྲོལ་བའི་དབེན་ཁྲོད་པདྨ་མཁའ་འགྲོའི་འདུ་གླིང་ནས་རྒྱ་ནག་ཁྲིན་ཏུར་ཆིབས་བསྒྱུར་གནང་། དེ་ནས་གནམ་གྲུར་བཞུགས་ནས་ལྷོ་ཁ་གངས་དཀར་གནམ་ཐང་དུ་ཕེབས་མ་ཐག ཕེབས་སྒུག་ཞུ་མཁན་རྣམས་ནས་ཕེབས་འཁོར་དང་ཕེབས་བསྒྲིགས་ཞུ་བ་བཞིན། གང་ཉིད་ཀྱི་གོང་མའི་གདན་ས་ལ་བྱོན་པའི་སྐབས། དགོན་གྱི་བླ་གྲྭ་རྣམས་ནས་དྲི་མེད་ལྷ་དར་དཀར་པོས་སྣ་དྲངས་ཏེ། བདུག་སྤོས། གདུགས་དང་རྒྱལ་མཚན་བ་དན་སིལ་སྙན་རོལ་མོ་སོགས་ཀྱིས་མདུན་བསུས་ཤིང་། ཕེབས་བསུ་རིང་ཐུང་དང་བཀོད་བསྒྲིགས་ཚད་ལས་འདས་པ་ཞུས་སོ། །
རྗེ་བཙུན་མ་མཆོག་འོག་མིན་ཨོ་རྒྱན་སྨིན་གྲོལ་གླིང་གི་མི་འཇིགས་དགོང་ལྔས་བཏེགས་པའི་ཁྲི་ལ་ཞབས་སོར་འཁོད། དུས་ཕུན་སུམ་ཚོགས་པ་བོད་ཟླ་དགུ་པའི་ཚེས་བཅོ་ལྔ་ཉིན་དེར། སྨིན་གྲོལ་གླིང་གི་བླ་སྤྲུལ་རྣམས་ཀྱིས་གཙོས་འདུས་སྡེ་ཡོངས་ནས་མཎྜལ་རྟེན་གསུམ་འདེགས་འབུལ་དང་འབྲེལ་རྗེ་བཙུན་མ་ལ་ན་བཟའ་སྤུས་ལེགས་ཆ་ཚང་དང་། ཨོ་རྒྱན་གཏེར་བདག་གླིང་པའི་ཕྱག་བཞེས་སུ་ཞྭ་པདྨ་མཐོང་གྲོལ་དབུ་ལ་གསོལ་ཞིང་བརྟན་བཞུགས་རྒྱས་པ་དང་། འབུལ་ཚན་ཚར་དུ་དངར་བ་བསྟར་ཏེ་གུས་པས་ཕུལ་ཏོ། །དེའི་ཕྱི་དྲོ་སྨིན་གླིང་དགོན་བླ་གྲྭ་ཡོངས་ནས་གསོལ་བ་ཇི་ལྟར་བཏབ་པ་བཞིན་རྗེ་བཙུན་མ་མཆོག་ནས་ཡབ་རྗེ་གཏེར་བདག་གླིང་པའི་གཏེར་ཁ་ལས་བྱུང་བའི་དཔལ་རྡོ་རྗེ་སེམས་དཔའི་ཐུགས་སྒྲུབ་རྣམ་གྲོལ་ལམ་བཟང་གི་བཀའ་དབང་ཟབ་མོ་སོགས་ཆོས་འབྲེལ་དང་། དགེ་འདུན་ཡོངས་ལ། སྨིན་གླིང་གཏེར་བདག་གླིང་པ་དང་ཀུན་མཁྱེན་མི་ཕམ་རྒྱ་མཚོའི་གདུང་ཚ་ལས་གྲུབ་པའི་སྟོན་པའི་སྐུ་འདྲ་རེ་དང་། བཤད་གྲྭ་རྣམས་ལ་འཇམ་དབྱངས་ཀྱི་སྐུ་འདྲ་རེ་དང་དར་བཅས་གནང་སྦྱིན་མཛད།
དེ་ནས་རྗེ་བཙུན་མ་མཆོག་གིས་གོང་མའི་གཟིམ་ཆུང་སོགས་རྟེན་གཙོ་རྣམས་དུས་འགྱུར་སྐབས་སུ་ཉམས་རྒུད་ཅི་ཙམ་སོང་ཡོད་མེད་གཟིགས་ཞིབ་གནང་སྐབས། གསང་སྔགས་ཕོ་བྲང་ནང་དུ་བཞུགས་པའི་ཡབ་རྗེ་གཏེར་བདག་གླིང་པའི་སྐུ་བརྙན་ང་འདྲ་མ་མཇལ་མ་ཐག་ཏུ་སྔོན་གནས་རྗེས་དྲན་གྱི་རྐྱེན་གྱིས་བཤུམ་པ་དྲག་པོ་མཛད་བཞིན་ཐུགས་སྨོན་ཟབ་རྒྱས་གནང་། འདིའི་སྐབས་ཆོས་མཛད་འཇམ་དཔལ་ལ་སོགས་དེར་བཞུགས་པའི་དགེ་འདུན་རྣམས་ནས་ཀྱང་། སྤྱིར་བསྟན་པའི་མངའ་བདག་འཕགས་བོད་ཀྱི་སྐྱེས་ཆེན་རྣམས་ཀྱི་ལུང་བསྟན་དང་ངོས་འཛིན་ལ་འཁྲུལ་བ་ག་ལ་སྲིད། ཁྱད་པར་དུ་སྔོན་གནས་རྗེས་དྲན་གྱི་ཚུལ་ལ་བསམ་ཚེ། མི་འགྱུར་དཔལ་སྒྲོན་དངོས་ཡིན་སྙམ་པའི་ངེས་ཤེས་ལྷག་པར་སྐྱེས་སོང་གསུངས། དེ་ནས་ཨོ་རྒྱན་སྨིན་གྲོལ་གླིང་གི་རྟེན་གཙོ་ཆེ་ཤོས་ད་སྐབས་ལྷག་ཡོད་པ་རྣམས་རྗེ་བཙུན་མའི་མདུན་དུ་སྤྱན་དྲངས་པར་གཟིགས་ཞིབ་གནང་ཞིང་ཁྲུས་གསོལ་དང་རབ་གནས་ཟབ་རྒྱས་མཛད་དོ། །དགེ་འདུན་ལྷན་རྒྱས་ནས་མ་འོངས་པར་གནས་འདིར་ཡང་ཡང་ཞབས་སོར་འཁོད་རྒྱུའི་རེ་འདུན་དང་། བསྟན་དང་འགྲོ་བའི་དཔལ་མགོན་དམ་པར་ཞབས་པད་རྡོ་རྗེའི་ཆོས་བདུན་དུ་བརྟན་ཅིང་། ཟབ་རྒྱས་ཆོས་ཀྱི་འཕྲིན་ལས་རྒྱུན་མི་འཆད་པ་དང་། བདག་ཅག་རྣམས་ལ་དམིགས་མེད་ཐུགས་རྗེ་ཆེན་པོའི་འོད་ཁང་ནས་ནམ་ཡང་མི་འདོར་བའི་གསོལ་འདེབས་མགྲིན་གཅིག་ཏུ་ཕུལ་བར། རྗེ་བཙུན་མ་མུ་མེད་ཡེ་ཤེས་མཚོ་མོ་ཉིད་ཀྱི་ཞལ་ནས་ཀྱང་། སྤྱིར་བུད་མེད་ཀྱི་ལུས་རྟེན་ཞིག་གིས་སངས་རྒྱས་ཀྱི་བསྟན་པ་ལ་བྱ་བ་ཆེན་པོ་ཞིག་འགྲུབ་དཀའ་ཡང་། སྔོན་དུས་རབས་བཅུ་བདུན་པའི་ནང་ཨོ་རྒྱན་སྨིན་གྲོལ་གླིང་བསྟན་པ་ལ་ཆག་འཇིག་ཆེན་པོ་བྱུང་སྐབས་རྗེ་བཙུན་མ་མི་འགྱུར་དཔལ་གྱི་སྒྲོན་མས་བསྟན་པ་ཉམས་པ་སླར་གསོ་དང་། མི་ཉམས་གོང་འཕེལ་གྱི་ཆོས་བརྒྱུད་སྤེལ་བ་སོགས་བསྟན་པའི་ཁུར་བླ་ནས་བླ་རུ་འདེགས་པར་འོག་མིན་ཨོ་རྒྱན་སྨིན་གྲོལ་གླིང་གི་བསྟན་པ་ཕྱི་དར་སྐབས་ཀྱི་ཤིང་རྟ་གཉིས་པ་ཞེས་ཡོངས་སུ་གྲགས་ཡོད་པ་བཞིན། ངེད་ལ་ཡང་མི་འགྱུར་དཔལ་གྱི་སྒྲོལ་མའི་མིང་ཙམ་ཐོགས་པ་ལ་བརྟེན་ནས་འོག་མིན་ཨོ་རྒྱན་སྨིན་གྲོལ་གླིང་གི་བཤད་སྒྲུབ་གཉིས་ཀྱི་བསྟན་པ་ལ་ཞབས་ཕྱི་གང་ཐུབ་ཞུ་ཆོག་པའི་ཞལ་བཞེས་གནང་སོང་། དེ་ནས་རིམ་བཞིན་དཔལ་གྱི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ལ་ཕེབས་ནས་དེར་བཞུགས་པའི་དགེ་འདུན་རྣམས་ནས་སྣེ་ལེན་ཟབ་རྒྱས་གནང་བར་རྗེ་བཙུན་མ་ཉིད་ནས་ཀྱང་ཆོས་འབྲེལ་གང་འཚམས་ཤིག་གནང་། དེ་ནས་ལྷ་ལྡན་ཕྱོགས་ལ་ཆིབས་ཁ་བསྒྱུར་ཏེ་ལྷ་ལྡན་གྱི་གཙུག་ལག་ཁང་གི་རྟེན་གྱི་གཙོ་བོ་ཇོ་བོ་ཤཱཀྱ་མུ་ནེའི་སྐུ་གཟུགས་ཡོངས་ལ་ཞལ་གསེར་ཕུལ་ཏེ་རྗེ་བཙུན་མ་སྐུ་འཁོར་ལྷན་རྒྱས་ནས་ཐུགས་བསྐྱེད་གདུང་ཤུགས་དྲག་པོས་གསོལ་འདེབས་དང་འབྲེལ་བྱང་ཆུབ་མཆོག་ཏུ་སེམས་བསྐྱེད་པ་དང་། ཀུན་ཏུ་བཟང་པོའི་སྨོན་ལམ་གྱིས་མཚམས་སྦྱར་ཏེ་ཕན་བདེ་འབྱུང་གནས་རྒྱལ་བའི་བསྟན་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། སྐྱེ་དགུ་རྣམས་བདེ་སྐྱིད་རྫོགས་ལྡན་གྱི་དཔལ་ལ་རོལ་བའི་ཐུགས་བསྐྱེད་ཟབ་རྒྱས་གནང་། ལྷ་སར་ཉིན་གསུམ་རིང་སྨིན་གྲོལ་གླིང་གི་བསྟན་བདག་སྲས་རིན་པོ་ཆེ་ཡང་ཐུགས་དགྱེས་ཚོར་ཆེར་བཞེས་ཀྱིས་དར་གོས་ཕྲུག་གསུམ་ལ་སོགས་པའི་འབུལ་བ་རྒྱ་ཆེར་བསྣམས་ནས་སྐུ་མདུན་དུ་ཕེབས་ཏེ། ད་རེས་རྗེ་བཙུན་མ་ཉིད་གོང་མའི་གདན་སར་ཕེབས་པ་དང་། གསེར་ཁྲིར་མངའ་གསོལ་མཛད་པར་ཁོང་ཉིད་ནས་དགའ་ཚོར་ཤིན་ཏུ་ཆེ་བ་དང་། སླད་ནས་ཀྱང་ཡང་ཡང་དུ་འབྱོན་རྒྱུའི་གསོལ་བ་འདེབས་པ་སོགས་གསུང་གླེང་ཞིབ་རྒྱས་གནང་། དེ་ནས། སྲིབ་མདའ་སྤྲུལ་སྐུ་ངེས་དོན་བསྟན་འཛིན་དང་། རྣམ་གླིང་མཁན་དཀོན་མཆོག་བསྟན་འཛིན། ཤུག་གསེབ་རིན་པོ་ཆེ། གཏེར་སྟོན་རྡོ་རྗེ་ཚེ་རྒྱལ་གྱི་སྲས་འོད་གསལ་རྡོ་རྗེ་དང་། བསྟན་པའི་སྒྲོན་མེ་སོགས་བླ་སྤྲུལ་དུ་མ་དང་། སེར་སྐྱ་མི་དམངས་ལ་མཇལ་ཁ་གནང་། སྐབས་དེར་གངས་རི་ཐོད་དཀར་དང་ཤུག་གསེབ་དགོན་པའི་མཁན་སྤྲུལ་ཡོངས་ནས་དགོན་པའི་ནང་ཞབས་སོར་འཁོད་རྒྱུའི་གསོལ་བ་བཏབ་ཀྱང་དུས་ཚོད་ཀྱི་རྐྱེན་གྱིས་དེ་རྣམས་སུ་ཕེབས་མ་ཐུབ་པར་བརྟེན་དགོན་པ་དེའི་ཡན་ལག་བ་ར་ཀླུ་སྒུག་ནང་། སྤྲུལ་སྐུ་དང་། བླ་མ། མཁན་པོ་ཇོ་མོ་ཡོངས་རྫོགས་སྐུ་མདུན་བཅར་ཏེ། དེར་མཎྜལ་རྟེན་གསུམ་འབུལ་བ་དང་རྗེ་བཙུན་མ་ཉིད་ནས་ཀྱང་ཆོས་འབྲེལ་གང་འཚམས་གནང་། དེ་ནས་ཕོ་བྲང་པོ་ཏཱ་ལ་དང་ནོར་གླིང་རྟག་བརྟན་མི་འགྱུར་ལྷུན་གྱིས་གྲུབ་པའི་ཕོ་བྲང་སོགས་ལ་གནས་གཟིགས་གྲུབ་མཚམས་སུ་ཉིད་ཀྱི་གདན་ས་གསེར་ལྗོངས་བླ་མ་རུང་གསང་ཆེན་འོད་སྐུར་གྲོལ་བའི་དབེན་ཁྲོད་པདྨ་མཁའ་འགྲོའི་འདུ་གླིང་དུ་བདེ་བར་ཞབས་སོར་བཀོད་དོ།།
སྤྱི་ལོ་༡༩༩༩ལོའི་རིག་འཛིན་གར་དབང་འབུམ་ཚོགས་ཆེན་པོའི་སྐབས་སུ། ཆོས་རྗེ་ཡིད་བཞིན་ནོར་བུ་དང་རྗེ་བཙུན་མ་ཉིད་ཀྱི་སློབ་འབངས་སུ་གཏོགས་པ་སྨིན་གྲོལ་གླིང་དགོན་ལག གོ་འཇོ་མཁོ་ཁྱིམ་དགོན། བྲག་ནག་དགོན། ཞེ་ཆེན་བསྟན་གཉིས་དར་རྒྱས་གླིང་ལ་སོགས་པའི་དགོན་ཁག་སུམ་ཅུ་ལྷག་ཙམ་གྱིས་བསྟན་བཞུགས་ཀྱི་གསོལ་འདེབས་དང་སྐུ་གསུང་ཐུགས་རྟེན་གྱི་མཎྜལ་ཟབ་རྒྱས་ཕུལ་བ་དང་རྗེ་བཙུན་མ་ཉིད་ནས་ཀྱང་སྟོན་པ་ཐུབ་པའི་དབང་པོའི་སྐུ་འདྲ་ཆུང་ངུ་རེ་གནང་སྦྱིན་དུ་བསྩལ།
སྤྱི་ལོ་༢༠༠༠ ལ་གསེར་ཐང་བླ་རུང་ལྔ་རིག་ཆོས་གྲྭ་ཆེན་མོར། ས་ག་ཟླ་བའི་རྡོར་སེམས་དུང་སྒྲུབ་ཆེན་མོའི་ཆོས་ཚོགས་སྐབས་དེར། ཨོ་རྒྱན་སྨིན་གྲོལ་གླིང་གི་འགན་འཛིན་གཞོན་པ་དགེ་དམ་ཆོས་བསྟན་འཛིན་དང་སྐྱོར་དཔོན་བཀྲ་ཤིས་དོན་གྲུབ་གཉིས་ཆེད་དུ་རྗེ་བཙུན་མ་ཉིད་ལ་སྐུ་གསུང་ཐུགས་རྟན་གྱི་མཎྜལ་དང་། ཟ་འོག་གི་བེར་དང་མཁན་ཞྭ་ལ་སོགས་པའི་ན་བཟའ་ཆ་ཚང་དང་།
དགེ་འདུན་ཡོངས་ལ་ཡང་འགྱེད་མང་ཇ་དང་། མར་མེ་མཆོད་པ་སོགས་རྒྱ་ཆེར་མཛད་པ་དང་དེ་མིན་སྨིན་གྲོལ་གླིང་གི་དགོན་ལག་ལྔ་བཅུ་ང་བདུན་ནས་བརྟན་བཞུགས་གསོལ་འདེབས་དང་འབྲེལ་བའི་སྐུ་གསུང་ཐུགས་རྟེན་གྱི་མཎྜལ་འབུལ་བ་ལ་སོགས་པའི་གསེར་ཁྲིར་མངའ་གསོལ་གྱི་མཛད་སྒོ་དང་། ཁྱད་པར་དུ་ཉག་རོང་རྫོང་གཅིག་གི་མངའ་ཁོངས་སུ་ཡོད་པའི་སྨིན་གྲོལ་གླིང་གི་དགོན་ལག་བཞི་བཅུ་གཙོ་བོར་བྱེད་པའི་དགོན་ཁག་ཡོངས་དང་རྗེ་བཙུན་མ་མུ་མཚོ་མཆོག་གི་སློབ་འབངས་སུ་གཏོགས་པ་ཐམས་ཅད་ཀྱིས་བརྟན་བཞུགས་གསོལ་འདེབས་དང་འབྲེལ་བའི་སྐུ་གསུང་ཐུགས་རྟེན་གྱི་མཎྜལ་གྱིས་སྣ་དྲངས་ཆེ་བ་རླངས་འཁོར། ཆུང་བ་ས་གདན། གྲུམ་ཙེ། སྟག་ལྤགས། གཟིག་གི་ལྤགས་པ་སོགས་རྒྱུ་ནོར་གྱ་ནོར་པ། ཕལ་ཆེར་ཤོག་སྒོར་ལ་ཕབ་ཚེ་ཁྲི་དྲུག་ཅུ་རེ་བདུན་ཁ་ལོང་ཙམ་དང་། དེ་མིན་དགོན་ལག་དང་སློབ་འབངས་རྣམས་ཀྱིས་དངོས་སུ་འབྱོར་བའི་མཆོད་པ་རྣམས་དང་། ཀུན་ཏུ་བཟང་པོའི་མཆོད་སྤྲིན་དུ་དམིགས་ཏེ་ཕུལ་ཀྱང་། ཡར་མཆོག་གསུམ་ལ་མཆོད་ཚུལ་ཙམ་མཛད་ནས་ཕྱིར་རང་རང་སོ་སོར་གནང་སྦྱིན་མཛད། བུད་མེད་ཀྱི་རྟེན་ཅན་ཞིག་ལ་དེ་ལྟ་བུའི་གསེར་ཁྲིར་མངའ་གསོལ་གཟབ་རྒྱས་ཤིག་བྱས་པ་ནི་ད་སྔོན་ལོ་རྒྱུས་ཐོག་ཤིན་ཏུ་དཀོན་པའི་གནས་སུ་སྣང་ངོ་། །
རྗེ་བཙུན་མ་མཆོག་ནས་བསྟན་པའི་སྙིང་པོ་ལུང་རྟོགས་ལ་དགོངས་ནས་ཨོ་རྒྱན་སྨིན་གྲོལ་གླིང་དགོན་པར་ཐོག་མར་བཤད་གྲྭ་འཛུགས་བསྐྲུན་གྱི་ཆེད་དུ་སྒོར་ཁྲི་བཅོ་ལྔ་དང་། རྡོ་སེམས་སྒྲུབ་པ་རྒྱུན་ཆགས་དང་བཤད་གྲྭ་རྣམས་ལ་གླ་ཕོགས་སོགས་སྔ་ཕྱིར་ཁྱོན་བསྡོམ་སྒོར་ཁྲི་ཉི་ཤུ་རྩ་གསུམ་དང་སྟོང་ལྔ་ཙམ་གནང་བས་མཚོན་བསྟན་པ་ལ་གཟིགས་སྐྱོང་གང་ལེགས་གནང་བཞིན་པའོ། །
སྤྱི་ལོ་༢༠༠༠བོད་ལྕགས་འབྲུག་ལོར་མདོ་ཁམས་གནས་ཆེན་ཉེར་ལྔའི་ནང་ཚན་ཉག་ཨ་ཛི་རོང་། གནས་ཆེན་ཤང་ལང་བྲག་དཀར་རམ་ལྷང་ལྷང་ནོར་བུ་ཡང་རྩེ་ལ་ལོ་འཁོར་གཅིག་གི་རིང་གནས་རྣམས་འདུས་པའི་སྐབས་སུ། ༧ཆོས་རྗེ་ཡིད་བཞིན་ནོར་བུ་དང་། རྗེ་བཙུན་མ་མུ་མཚོ། ཨ་ནེ་མེ་སྒྲོན་ཏེ་སྐུ་འཁོར་གསུམ་གྱི་སྐུ་བརྙན་བྲག་རི་ལ་རང་བྱོན་དུ་གྲུབ། སྒྲོ་བཏགས་དང་འུད་བསྟོད་ཙམ་མིན་པར་དད་ལྡན་རྣམས་ཀྱི་མིག་གི་བདུད་རྩིར་མངོན་སུམ་དུ་གྱུར་པ་ད་ལྟ་ཡང་དངོས་སུ་མཇལ་རྒྱུ་ཡོད་ལ། མང་པོ་ཞིག་གི་ཁོང་རྣམ་པ་གསུམ་རྫུ་འཕྲུལ་གྱིས་གནས་དེར་བྱོན་ནས་བྱིན་གྱིས་རླབས་པའི་རྟགས་མཚན་དུ་ཡིད་ཆེས་བྱེད་ཀྱི་འདུག་གོ།
འདི་སྐབས་ཤིག་ཏུ་ཉག་རོང་གུ་རུ་དགོན་གྱི། བསྟན་འཛིན་རྡོ་རྗེ་ལ་གདོན་འདྲེས་གནོད་པ་བྱུང་སྐབས། རྗེ་བཙུན་མ་ལ་གསོལ་བ་དྲག་ཏུ་བཏབ་པས། མུ་མཚོ་རིན་པོ་ཆེའི་སྐུ་བརྙན་གསུང་འབྱོན་ཞིང་། འདྲེ་ངན་བསྐྲད་པ་དང་། དཀོན་མཆོག་ལ་དད་པ་དང་དག་སྣང་། ལས་འབྲས་ལ་ཡིད་ཆེས་སོགས་ཞལ་གདམས་མང་པོ་དངོས་སུ་གསུངས་སོ། །དེ་བཞིན་དུ་རྗེ་བཙུན་མ་མུ་མཚོར་ཤིན་ཏུ་དད་པའི་འབྲོག་པའི་བུ་མོ་ཞིག་ལ་ཐོག་ཟེར་ཕོག་ནས་གོན་པ་ཡོངས་རྫོགས་ཚིག་པར་གྱུར་ཀྱང་། རྗེ་བཙུན་མའི་སྐུ་པར་དང་། སྐུ་པར་འཕྲད་པའི་གོན་པ་དུམ་བུ་མ་ཚིག་པར་ཡོད་ལ། བུ་མོའི་ལུས་ལ་གནོད་པ་ཅི་ཡང་མ་བྱུང་ངོ་།། ཡང་རྗེ་བཙུན་མའི་དངོས་སློབ་ཉག་རོང་རྨེ་ཁོག་གི་ཇོ་མོ་འཆི་མེད་ལ་ཐོག་ཟེར་ཕོག་སྐབས། རྗེ་བཙུན་མ་མུ་མཚོའི་སྐུ་པར་བཏགས་ཡོད་པས་ཅུང་ཟད་ཀྱང་མ་གནོད་ལ། འགྲམ་གྱི་ར་ལུག་མང་པོ་བསད་རྨས་སུ་གྱུར། འདི་རིགས་མང་ཡང་ཞིབ་པར་མ་སྤྲོས་སོ།།
སྤྱིར་ལོ་༢༠༠༠ལྕགས་འབྲུག་ཟླ་ ༨ ཚེས ་༡༡ ལ་ཆོས་རྗེ་ཡིད་བཞིན་ནོར་བུའི་གཙོས། སྐུ་འཁོར་གསུམ་དང་རྒྱ་བོད་ཇོ་སེར་སུམ་སྟོང་ཙམ་རྗེ་བཙུན་མའི་སྐུ་འཁྲུངས་པའི་ཡུལ་འཛི་ཆེན་ཁྱུང་ཤར་བྱ་བར་ཕེབས། རྗེ་བཙུན་མ་སྐུ་འཁྲུངས་པའི་གནས་དེར་ཨ་སྐྱབས་ཚོ་བས་མཆོད་རྟེན་གསར་བཞེངས་ཀྱི་ཁུར་བླངས་ཏེ་འགྲོ་བའི་བསོད་ནམས་གསོགས་པའི་རྟེན་དུ་ཡོངས་སུ་གྲུབ་པར་བྱས་སོ། །
མདོར་ན། དེ་སྔ་ཡན་ཆད་དུ་རྗེ་བཙུན་མ་མུ་མེད་ཡེ་ཤེས་མཚོ་མོའི་མཛད་པ་གཙོ་བོ་ནི། བདེ་ཆེན་ཞིང་སྒྲུབ་ཆེན་མོ་ལན་བདུན་སྐབས་མི་གྲངས་ས་ཡ་གཅིག་དང་འབུམ་ཐེར་བདུན་ལས་བརྒལ་བ་དང་། ༧ ཆོས་རྗེ་མཆོག་དང་ལྷན་དུ། འཛམ་གླིང་གོ་ལ་ཧྲིལ་པོ་གཡས་སུ་བསྐོར་བའི་སྐབས་ཀྱི་གདུལ་བྱ་གྲངས་མེད་པ་ལ་དམ་ཆོས་བདུད་རྩིའི་བགོ་སྐལ་མང་དུ་བཀྱེས་ཏེ་ལྟོས་བཅས་ཀྱི་འགྲོ་བ་རྣམས་ཀུན་ཏུ་བདེ་བའི་གནས་ལ་བཀོད་པ་དང་། ཁྱད་པར་དུ་བོད་ཀྱི་བུད་མེད་ཀྱི་རྟེན་ཅན་རྣམས་ལ་དམིགས་པ་མེད་པའི་བརྩེ་བ་ཆེན་པོས་རྗེས་སུ་བཟུང་ནས། འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ཏེ། ཞི་བ་བྱང་ཆུབ་ཀྱི་ལམ་ལ་འགོད་པའི་ཕྱིར། བུད་མེད་སྟོང་ཕྲག་མང་པོ་དམ་པའི་ཆོས་ཀྱི་སྒོར་རབ་ཏུ་ཕྱུང་བ་དང་། དེའི་ནང་ནས་མཁས་བཙུན་བཟང་གསུམ་ལྡན་པའི་བཙུན་མ་བརྒྱ་ལྷག་གསོ་སྐྱོང་གནང་། ཕྱོགས་ཀྱི་ཇོ་དགོན་རྣམས་ལ་མཁན་མོ་ཆེད་མངགས་མཛད། གསེར་ལྗོངས་བླ་མ་རུང་། རང་བྱུང་དྷཱུ་མ་ཐ་ལའི་པདྨ་མཁའ་འགྲོའི་འདུ་གླིང་ན། གླིང་གསུམ་ཚོམ་ལྔ། རྫོང་བརྒྱད་ཀྱི་ཁོངས་སུ་གཏོགས་པའི་སྒྲིག་གཞི་བཀོད་དེ། ༼གླིང་གསུམ་གྱི་དབང་དུ་བྱས་ན། ལྷན་སྐྱེས་ཆོས་སྐུའི་གླིང་། ཞིང་སྐྱེས་ལོངས་སྐུའི་གླིང་། སྔགས་སྐྱེས་སྤྲུལ་སྐུའི་གླིང་། ཚོམ་ལྔའི་དབང་དུ་བྱེད་ན། དབུས་ཕྱོགས་རྡོ་རྗེའི་ཚོམ། ཤར་ཕྱོགས་འཁོར་ལོའི་ཚོམ། ལྷོ་ཕྱོགས་རིན་ཆེན་ཚོམ། ནུབ་ཕྱོགས་པདྨའི་ཚོམ། བྱང་ཕྱོགས་རལ་གྲིའི་ཚོམ་སྟེ་ཚོམ་ལྔའོ།། རྫོང་བརྒྱད་ཀྱི་ཁོངས་གཏོགས་ཀྱི་དབང་དུ་བྱེད་ན། གསེར་རྟ་རྫོང་། བྲག་འགོ་རྫོང་། དཀར་མཛེས་རྫོང་། ཉག་རོང་རྫོང་། རྟའུ་རྫོང་། དར་མདོ་རྫོང་། མཚོ་སྔོན་ཞིང་ཆེན་རྫོང་གཅིག་གི་ཁོངས་སུ་གཏོགས། དབུས་གཙང་རྫོང་གཅིག་ཁོངས་སུ་གཏོགས་པར་བྱས་ནས་རྫོང་བརྒྱད་དོ།།༽དེ་ཐམས་ཅད་ལ་ཉིན་རེར་ཆོས་ཁྲིད་གཉིས་རེ་ཆད་མེད་དང་། ལོ་ན་ཆུང་བ་རྣམས་མདོ་སྔགས་རིག་གནས་དང་བཅས་པ་ལ་སློབ་སྦྱོང་དང་། ལོ་ལྔ་བཅུ་ཡན་ཆད་རྣམས་ལ་སྔོན་འགྲོ་འབུམ་ལྔའི་བསགས་སྦྱོང་དང་། ཡི་དམ་བསྙེན་ཚད་འཁྱོལ་བར་བྱས། ཡར་མར་ངོས་ཀྱི་ཚེས་བཅུ། གསོ་སྦྱོང་། སྨྱུང་གནས་ཆ་བརྒྱད་ཞུ་བ་སོགས། ཐོས་བསམ་སྒོམ་གསུམ་དང་དགེ་སྒྲུབ་སྡིག་སྤོང་གི་བྱ་བ་ལ་སྦྱོར་དུ་བཅུག་སྟེ། དེ་ནི་མཛད་པ་ཐམས་ཅད་ཀྱི་ནང་ནས་མཆོག་ཏུ་འཁུམས་སོ།།
ད་སྐབས་རྗེ་བཙུན་མ་མུ་མཚོ་རིན་པོ་ཆེས་ཞབས་དཀར་ཚོགས་དྲུག་རང་གྲོལ་གྱི་ལྟ་བ་མཁའ་ལྡིང་གཤོག་རླབས་དགེ་འདུན་པ་སུམ་སྟོང་ཙམ་ལ་ལྗགས་ཁྲིད་གནང་བཞིན་པས་མཚོན་སྐུ་གསུང་ཐུགས་ཀྱི་མཛད་པ་གང་ཅིའི་ངོས་ནས་སྐུ་སྐྱེ་གོང་མ་རྗེ་བཙུན་མ་མི་འགྱུར་དཔལ་གྱི་སྒྲོལ་མའི་རྣམ་ཐར་གྱི་རྗེས་སུ་སྙེགས་པར་གྱུར་ཏོ།།
སླར་སྨྲས་པ།
མུ་མེད་མཁའ་མཐའི་རྗེས་སོང་སྐུ་དྲིན་གྱིས།།
ཁ་བ་རི་བའི་སྐྱེ་རྒུ་ལེགས་སྐྱོང་བ།།
མ་གཅིག་ཡེ་ཤེས་མཚོ་རྒྱལ་ཟློས་པའི་གར།།
སྐུ་གསུམ་མཁའ་འགྲོའི་གཙོ་མོ་རྒྱལ་གྱུར་ཅིག །
སྔོན་བསགས་བསོད་ནམས་སྐྱ་རེངས་ཀྱིས་བོས་པའི།།
རྒྱལ་བསྟན་ལྷ་ལམ་མཛེས་རྒྱན་གང་སྐུའི་ཉི།།
མཁས་བཙུན་གྲུབ་པའི་གཟི་འོད་འབུམ་སྤྲོས་ཏེ།།
གདུལ་བྱའི་པད་ཚལ་སྐྱོང་བའི་མ་གཅིག་མ།།
མཁས་པའི་ངང་ཚུལ་བརྗོད་འདོད་ཙམ་མིན་འཆད་རྩོད་རྩོམ་པའི་གངས་རི་བརྗིད།།
གྲུབ་པའི་ཡོན་ཏན་ཕྲ་མོ་ཙམ་མིན་མཆོག་ཐུན་གྲུབ་པའི་སྤྲིན་གྱིས་མཛེས།།
བཟང་པོའི་ཕྲིན་ལས་ཕྱོགས་རེ་ཙམ་མིན་ལས་བཞི་གྲུ་ཆར་ཀུན་ཏུ་འབེབས།།
རྨད་བྱུང་རྣམ་ཐར་རབ་བཏགས་ཙམ་མིན་ས་སྟེང་སྐྱེ་རྒུ་དགྱེས་པའི་གཏམ།།
དྲན་ཤེས་བག་ཡོད་ལྕགས་རིའི་མུ་ཁྱུད་དབུས།།
གཡོ་མེད་བསླབ་གསུམ་རིན་ཆེན་ལྷུན་པོ་བརྗིད།།
མདོ་སྔགས་ཡོན་ཏན་ཉི་ཟླའི་རྣ་ཆ་སྒེག།
རྗེ་བཙུན་ཡེ་ཤེས་མཚོ་མོ་ཞབས་བརྟན་ཤོག།
རྗེ་བཙུན་འཕགས་མའི་རྣམ་ཐར་ཆུ་ཀླུང་འབུམ།།
རྫོགས་པར་འཐུང་བའི་ཡོན་ཏན་ན་ཕྲ་ཡང་།།
དད་བརྩོན་ཀུ་ཤའི་རྩེ་མོར་ཆགས་པའི་རྡུལ།།
སྐལ་ལྡན་གདུལ་བྱའི་དད་པའི་གསོས་སུ་སྨོན།།
རབ་འབྱམས་སྲས་བཅས་རྒྱལ་བའི་ཡེ་ཤེས་སྐུ།།
ཐུན་མཚམས་སྤྲིན་གྱི་ལང་ཚོ་ལ་ཆགས་པའི།།
འཇམ་མགོན་མཁྱེན་པའི་ཟླ་ཤེལ་གསལ་བ་དེ།།
མཁྱེན་རབ་ཆུ་གཏེར་འཕེལ་བའི་དགེ་ལེགས་སྩོལ།།
ཅེས་པ་འདི་ནི་ཕྲན་ལ་ལོ་གསུམ་ཙམ་སྔོན་ནས་བྲི་འདུན་ཡོད་ཀྱང་རྣམ་གཡེང་གི་ངང་དུ་ལུས། དེ་རྗེས་ཉག་རོང་མཁན་པོ་བསོད་ནམས་རྒྱ་མཚོ་སོགས་མཁན་པོ་དུ་མ་ཞིག་གིས་བསྐུལ་བ་དང་། གོ་འཇོ་མཁོ་ཁྱིམ་སྤྲུལ་སྐུ་སྒྲོན་སྐྱབས་ནས་ཟིན་བྲིས་དུ་མ་གནང་། འགོ་ལོག་དབང་སྟོད་སྤྲུལ་སྐུ་ཐུབ་ནོར་དང་མཆོག་སྤྲུལ་བསྟན་འཛིན་རྒྱ་མཚོ་རྣམ་གཉིས་ནས་འཆར་འགོད་དང་དག་བཅོས་ལ་བཀའ་དྲིན་བསྐྱངས། ལྕགས་འབྲུག་ལོ་བོད་ཟླ་༡༠ཚེས་༢༥པདྨ་མཁའ་འགྲོ་འདུ་བའི་དུས་ཆེན་ལ། རྫོགས་པའི་སངས་རྒྱས་ཆོས་རྗེ་ཡིད་བཞིན་ནོར་བུའི་རིགས་བདག་ཏུ་ཐོབ་པའི་བན་གཟུགས་གྱི་ན་བ་ཉག་རོང་ཨ་བཀྲ་ཡིས། ཞི་བདེ་རྒྱ་མཚོ་ཆེན་པོའི་དབུས་ཀྱི་གླིང་ཕྲན་ཐེ་ཝན་བླ་རུང་མདོ་སྔགས་རིག་པའི་ཆོས་ཚོགས་སུ་གུས་པས་སྦྱར་བ་དགེ་ལེགས་འཕེལ།།