༄༅། །རྗེ་བཙུན་མ་མུ་མེད་ཡེ་ཤེས་མཚོ་མོ་ལ་བསྟོད་པ་གུར་གུམ་གསར་བའི་ཆུན་པོ་ཞེས་བྱ་བ།
མུ༵་མེ༵ད་སྟོང་ཆེན་དབྱིངས་ཀྱི་ལྷུམས་ནས་སྐུ་དང་ཡེ༵་ཤེ༵ས་གསང་བའི་འཕྲུལ།།
གང་འདུལ་འདོད་སྟེར་རོལ་པ་མ་འགགས་ངོ་མཚར་ཆུ་ཟླའི་ཟློས་གར་ལས།།
མཚོ༵་རྒྱལ་ཌཱ་ཀྐིའི་ཅོད་པན་འཛིན་པ་རྗེ་བཙུན་མི་འགྱུར་དཔལ་གྱི་སྒྲོན།།
སླར་ཡང་གངས་ཅན་རི་བོའི་ཁོངས་སུ་ཆོས་ཀྱི་རྒྱལ་མོ༵འི་རྣམ་པར་བཞེངས།།
གངས་རིའི་མགོན་པོའི་རྡོ་རྗེའི་གསུང་གིས་ངོ་མཚར་མཚན་གྱི་མེ་ཏོག་རྒྱན།།
ཁྱོད་ཀྱི་དབུ་ལ་རྣམ་པར་དཔྱངས་ནས་སྭ་སྟིའི་དབྱངས་ཀྱི་ཤིས་བརྗོད་བཅས།།
རྒྱལ་ཐབས་སྦྱིན་བླུགས་དབང་ཆེན་ཡོངས་བསྐུར་ཆེ་བ་སྟོང་ལྡན་རིགས་ཀྱི་ཁྲིར།།
རྨད་བྱུང་རྟེན་འབྲེལ་ལེགས་རྒུའི་གསོས་སུ་མངའ་གསོལ་གཟེངས་བསྟོད་དབུགས་དབྱུང་མཛད།།
འཇིགས་མེད་ཡབ་རྗེ་བཙུག་ཏུ་སྟེན་བཞིན་གསེར་ལྗོངས་ཆོས་ཀྱི་ཞིང་ས་རུ།།
སྔོན་མེད་སྐུ་གསུམ་མཁའ་འགྲོའི་འདུ་གླིང་རྟེན་དང་བརྟེན་པ་ཡོངས་བསྐྲུན་ཏེ།།
ཟབ་རྒྱས་ཆོས་འཁོར་གཡས་སུ་བསྐོར་བས་ཕྱོགས་ཀུན་དཀར་འཇམ་ཡུག་གཅིག་ཏུ།།
མངོན་པར་བསྒྱུར་བའི་སྣང་བའི་རྩེ་དགའ་ལྔ་བདོའི་མུན་པའི་གཤེད་དུ་སྤྲོས།།
རྡོ་རྗེ་རྩེ་མོའི་གསང་ལམ་ལ་བརྟེན་འཇའ་ལུས་འཕོ་བ་ཆེན་པོའི་སྐུར།།
ཡོངས་བཞེངས་གྲུབ་པའི་འཁོར་ལོས་སྒྱུར་བ་པད་མའི་རྒྱལ་ཚབ་བདུད་འདུལ་རྗེས།།
དུས་གསུམ་སྒྲིབ་མེད་མཁྱེན་པའི་ལུང་གིས་ཉག་ཡུལ་གསེར་ལྡན་སྒེག་མོ་རུ།།
རླབས་ཆེན་བསྟན་སྲིད་ཕྲིན་ལས་སྐྱོང་བར་བསྔགས་པའི་མེ་ཏོག་རིང་ནས་འཐོར།།
སྐུ་ཡི་མེ་ཏོག་གངས་ཅན་ཤར་ཕྱོགས་མདོ་ཁམས་དབྱིག་འཛིན་སྒེག་མོ་རུ།།
སྐལ་བཟང་སྐྱེ་འགྲོའི་དཔལ་དུ་བཞད་ཀྱང་སྙན་གྲགས་བསུང་ཞིམ་མངར་མོའི་དྲི།།
དབུས་གཙང་ཆོས་ཀྱི་ཞིང་སར་འཕོས་ནས་གསང་ཆེན་སྨིན་གྲོལ་ཆོས་ཀྱི་སྡེ།།
ངེས་པ་དོན་གྱི་དགའ་བའི་སྐྱེད་ཚལ་རྫོགས་ལྡན་དཔལ་གྱིས་མཛེས་པར་བྱས།།
སྟོང་ཕྲག་བགྲང་བྱས་ཕྲག་པར་བཀལ་བའི་སྙོམས་མིན་ལས་དབང་ཁུར་ཆེན་གྱིས།།
རྣམ་པར་དུབ་པའི་བུད་མེད་ཚོགས་རྣམས་ཐུགས་རྗེའི་ཕྱག་གིས་ཡོངས་བསྐྱབས་ཏེ།།
གུར་གུམ་རྡུལ་གྱིས་ས་འདི་དཀྲིགས་པའི་དུས་ཀྱི་ལང་ཚོའི་དམར་འོད་ཀྱིས།།
གངས་ལྗོངས་ཐུབ་བསྟན་མཛེས་པར་བྱས་སོ་སྤྲུལ་པའི་མྱུ་གུ་རྗེ་བཙུན་མ།།
ཁྱེད་སྐུ་ད་དུང་ན་ཚོད་ཕྲ་བས་ལས་ཀྱིས་འབྲེལ་བའི་ཞིང་ས་འདིར།།
ཡུན་ནས་ཡུན་དུ་འཚོ་ཞིང་གཞེས་ཏེ་མི་མཐུན་ཕྱོགས་རྣམས་ཀུན་ལས་རྒྱལ།།
ཐུགས་བསྐྱེད་ཕྲིན་ལས་འཇུག་པ་མི་ལྷོད་བསྟན་འགྲོའི་ཕན་བདེ་རིང་དུ་སྐྱོང་།།
བཞེད་རྒུའི་རེ་འབྲས་ཆོས་བཞིན་ལེགས་འགྲུབ་བཀྲ་ཤིས་དགེ་མཚན་དར་གྱུར་ཅིག།
ཅེས་པ་འདི་ནི་སྙོམ་ལས་པ་བསྟན་འཛིན་རྒྱ་མཚོས་ལྷག་བསམ་རྣམ་པར་དགེ་བས་ལྕགས་འབྲུག་ལོའི་ཟླ་ཚེས་ལ་བྲིས་པ་དགེ་ཞིང་བཀྲ་ཤིས་པར་གྱུར་ཅིག། །།